بھارت ولوں میزائل پاکستان آنا انتہائی غیرذمہ دارانہ فعل اے،عارف علوی

اسلام آباد(پنجابی میڈیاب گروپ) صدر مملکت ڈاکٹر عارف علوی نے آکھیا اے کہ پاکستان خلا داپُرامن استعمال چاہندااے،پاکستان نوں اپنے سیٹلائٹس بنانے نیں تے ساہنوں خودانحصاری دی منزل حاصل کرنا پئے گی، پاکستانی قوم مضبوط عزم دی حامل اے تے اوہ کسی وی چیلنج اُتے قابو پان دی صلاحیت رکھدی اے،اعلیٰ اخلاقی اقدارتے علم دی بنیاد اُتے اسیں کامیابی حاصل کرسکدے ہاں۔پاکستان ٹیکنالوجی دے میدان وچ بڑی کامیابی حاصل کرن دی صلاحیت رکھدااے،ٹیکنالوجی دااستعمال انسانیت دی ترقی لئی ہونا چاہیدا اے،بھارت ولوں میزائل پاکستان آنا انتہائی غیرذمہ دارانہ فعل اے،غیرذمہ دارانہ اقدام کسی وی وڈی تباہی دا باعث بن سکدے نیں،ساڈی پہلی ترجیح ملکی دفاع نوں مضبوط بنانا اے۔ایہہ گلاں اوہناں نے بدھ نوں ایتھے سپارکو دے پربندھ ہیٹھ’’بین الاقوامی سپیس کانفرنس‘‘نال خطاب کردیاں ہویاں کتیاں۔ کانفرنس وچ چیئرمین سپارکو میجر جنرل(ر)عامر ندیم،خلائی تحقیق دے سائنسداناں،غیر ملکی مندوبیناں تے ہور نمایاں شخصیتاں نے رلت کیتی۔