جد الیکشن دا اعلان کردتا تے اپوزیشن سپریم کورٹ وچ کیہ کررہی اے؟وزیراعظم

اسلام آباد(پنجابی میڈیا گروپ)وزیر اعظم عمران خان نے آکھیا اے کہ جد الیکشن دا اعلان کردتا تے اپوزیشن سپریم کورٹ وچ کیہ کررہی اے؟عوام دے سوالاں دا براہِ راست جواب دیندیاں ہویاں وزیر اعظم عمران خان نے آکھیا کہ اج کل جیہڑی پاکستان دی صورتحال بنی ہوئی اے ایس سلسلے وچ سوچیا اے کہ میں تہاڈے ساہمنے آکے تہاڈے سوالاں داجواب دیاں۔اوہناں نے آکھیا کہ اسیں اسمبلی تحلیل کردیاں ہویاں الیکشن کروان دا فیصلہ کیتا اے،ایہ ایس لئی کیتا گیا کہ ساڑھے 3 ورھے توں اپوزیشن کہہ رہی سی حکومت نا اہل اے، ایہ عوام وچ جان گے تے عوام اوہناں نوں انڈے مارے گی۔وزیر اعظم نے آکھیا کہ میں تے الیکشن دااعلان کردتا اے،تے ہن ایہ سپریم کورٹ کیوں جارہے نیں،ایہ ای تُسی کہندے سوکہ ایہ حکومت نا اہل تے سلیکٹڈ اے ہن اسیں الیکشن دا اعلان کردتا ات تے تُسی سپریم کورٹ وچ کیہ کر رہے او۔اوہناں نے آکھیاکہ ایہ چاہندے نیں کہ حکومت بحال ہوئے ،عوام دے فیصلے نال واپس آنا بہتر اے یا اک باہر دی سازش دا حصہ بن کے،پارلیمنٹرین دے ضمیر خرید کے حکومت بنانا بہتر اے۔عمران خان نے آکھیا کہ میں تہانوں دسنا چاہندا ہاں ایہ اینج کیوں چاہندے نیں،اوہناں دی سبھ توں وڈھی کوشش این آر او لینا اے، کیونکہ اوہناں اُتے کرپشن کیس نیں،تے ایہ ضمانت اُتے نیں تے باہر نٹھے ہوئے نیں،اوہناں دی ساری کوشش ایہ اے کہ اقتدار وچ آن گے تے اپنے اوپر کیس ختم کرن گے تے این آر او ٹو لین گے۔