امریکی سازش آکھن والے اج اوہناں دے پیر پھڑ رہے نیں،مریم نواز

گوجرانوالہ(پنجابی میڈیاگروپ)مسلم لیگ ن دی چیف آرگنائزر تے سینئر نائب صدر مریم نواز نے آکھیا اے کہ ساہنوں امپورٹڈ آکھن والاخود ایکسپورٹ ہون نوں تیار بیٹھا اے، کل تک امریکی سازش دا رونا رون والے اج امریکیاں دے پیر پھڑ رہے نیں۔گوجرانوالہ وچ مسلم لیگ ن دے تنظیمی کنونشن نال خطاب کردیاں ہویاں مریم نواز نے آکھیا کہ جیہڑا کہندا اے کہ نوجوان (ن)لیگ دے نال نہیں اوہ اج دا کنونشن ویکھ لئے، اوہناں نے آکھیا کہ2018وچ آر ٹی ایس بٹھا کے الیکشن چوری کیتا گیا سی ،مریم نواز نے آکھیا کہ پاکستان دے سب توں وڈے فتنے، نوسرباز، گھڑی چور نوںپہلاں گوجرانوالہ نے پہچانا سی، اوس دا2014دا نکام دھرنا سب نوں یاد اے۔مسلم لیگ ن دی سینئر نائب صدر نے آکھیا کہ بڑی تکلیف اے مریم نے ایہ کہہ دتا، اوہ کہہ دتا، پرویزالہی دی آڈیو سنی اے؟ ڈاکٹر یاسمین راشد دی آڈیو سنی؟ فواد چودھری دی آڈیوسنی اے ناں؟ ہُن ٹرک پھڑیا گیا اے۔مریم نواز نے آکھیا کہ ہن ایہ نہ کہہ دینا ٹرک مریم نواز چلا رہی سی، ایہ ٹرک ایس ملک نوں لے بیٹھ گیا اے، ایس ٹرک دے چاروں پہیے پنکچر کر کے گھر گھلاں گے، ہُن مریم نواز نوں کوئی تقریر کرن دی لوڑ نہیں، جیتھے ٹرک چلدا ویکھو گے آپئی سمجھ جائو گے، جد مریم نواز شیشہ وکھاندی اے تے توہین عدالت یاد آجاندی اے، توہین عدالت تَد نہیں ہُندی جَد منتخب وزیراعظم نوں باہر کر دیندے او۔