عوام مہنگائی دا انتقام عمران خان نوں ووٹ دے کے لوئے گی: شیخ رشید

اسلام آباد( پنجابی میڈیاگروپ)سربراہ پاکستان عوامی مسلم لیگ تے سابق وفاقی وزیر داخلہ شیخ رشید احمد نے آکھیا اے کہ آن والے الیکشن وچ لوگ حکمراناں توں مہنگائی دا انتقام لین گے تے عمران خان نوں ووٹ دین گے۔اسلام آبادوچ سپریم کورٹ دے باہر میڈیا نال گل بات کردیاں ہویاں سابق وفاقی وزیر داخلہ شیخ رشید دا کہنا سی کہ اج اوور سیز پاکستانیاں نوں ووٹ بارے کیس دی سماعت ہوئی، الیکشن کمیشن توں پچھیا گیا کیہ کارکردگی وکھائی، الیکشن کمیشن نے اجے تک پائلٹ پراجیکٹ وی شروع نہیں کیتا۔اوہناں نے آکھیا کہ جیہڑا الیکشن بارے سپریم کورٹ فیصلے دی حکم عدولی کرے گا اوہ کٹہرے وچ کھڑا ہوئے گا، الیکشن ہو کے رہن گے ،کوئی طاقت اینہاں الیکشن نوں نہیں روک سکدی۔سابق وزیردا ہور کہنا سی کہ پنجاب تے خیبرپختونخوا وچ الیکشن ہون جا رہے نیں، مہنگائی دے طوفان دا انتقام عوام ووٹ نال لین گے تے عمران خان دی حمایت کرن گے۔ایس موقع اُتے رہنما تحریک انصاف تے سینیٹر شبلی فراز نے آکھیا کہ اوورسیز ووٹرز ایس گل اُتے سخت نراض نیں کہ ووٹ دا حق اوہناں توں کیوں کھویا گیا اے، پی ٹی آئی دی جنگ ایہی اے اسیں لوکاں نوں حقوق دلوان،اسیںچاہندے نیں اوورسیز نوں ووٹ دا حق دتا جائے۔