بزدل عمران خان گرفتاری توں ڈررہیا اے:عطااللہ تارڑ

کراچی(پنجابی میڈیاگروپ)وزیراعظم دے معاون خصوصی عطااللہ تارڑ نے آکھیا اے کہ اک شخص قنون دیاں دھجیاں اڑرہیا اے، عمران خان نے عدالتی حکم نامے دے ڈر توں خود نوں کمرے وچ بند کر لیا۔کراچی وچ میڈیا نال گل بات کردیاں ہویاں مسلم لیگ(ن)دے رہنما عطااللہ تارڑ نے آکھیا کہ اک شخص طلبی دے باوجود عدالتاں وچ پیش نہیں ہورہیا،خود نوں لیڈر کہن والا حکم امتناع دے پیچھے چھپ رہیا اے،عدالتاں عمران خان نوں فرد جرم عائد کرن لئی بلا رہیاں نیں، اوہناں نے توشہ خانہ توں ارباں روپے دے تحفے لُٹے، عمران خان نے خانہ کعبہ دے ماڈل والی گھڑی ویچ دتی ۔ عطا اللہ تارڑ نے ہور آکھیا کہ عمران خان دے والد نوں وی کرپشن کرن اُتے نوکری توں کڈیا گیا سی، اینہاں نے کروڑاں نہیں ارباں روپے دی چوری کیتی اے،ساڈے اُتے جھوٹے کیساں وچ فرد جرم عائد ہُندی سی، اک وزیراعظم نوں بیٹے توں تنخواہ نہ لین اُتے کَڈیاگیا، بزدل عمران خان گرفتاری توں ڈردا اے، اینہاں نے اپنے اثاثے چھپائے، قوم دے ارباں روپے لُٹ کے خود نوں کمرے وچ بند کر کے بیٹھیا اے۔