پاگل خان ساہنوں ایسی دلدل وچ پھسا گیا، بڑی مشکل نال پار لگاں گے،آصف زرداری

وہاڑی(پنجابی میڈیاگروپ)پاکستان پیپلز پارٹی دے شریک چیئرمین سابق صدرآصف علی زرداری نے آکھیا اے کہ پاگل خان ساہنوں اینج دی دلدل وچ پھَسا گیا، بڑی مشکل نال پار لگاں گے، دیوالیہ ہوگیا ،دیوالیہ ہوگیا ایہ گلاں ہورہیاں نیں، امریکا، جاپان تے برطانیہ وی دیوالیہ ہوگئے سن، ایس نال کجھ فرق نہیں پیندا ۔ استقبالیہ تقریب نال خطاب کردیاں ہویاں آصف علی زرداری نے آکھیا کہ اک بے وقوف نوں وزیراعظم بنادتا گیا جس نے ملک دی معیشت نوں تباہی دے دہانے اُتے لیا کھڑی کیتی اے، ایس نوں کوئی سمجھ ہی نہیں سی، پاگل خان نے ملک دا خانہ خراب کردتا ، عمران خان واپس اوتھے جانا چاہندا اے جیتھوں اوس نوں کڈیا گیا ۔ اوہناں نے آکھیا کہ پاگل خان ساہنوں اینج دی دلدل وچ پھسا گیا کہ بڑی مشکل نال پار لگاں گے، لیکن لگاں گے ضرور، اج وی اوہ سیاست وچ ون ڈے کرکٹ کھیڈ رہیا اے لیکن میں عزم کر رکھیا اے ملک نوں مسائل توں کَڈاں گا تے ہر قیمت اُتے کَڈاں گا۔