توشہ خانہ کیس: عمران خان دے وارنٹ گرفتاری معطل

اسلام آباد( پنجابی میڈیاگروپ)اسلام آباد ہائی کورٹ نے توشہ خانہ کیس وچ سابق وزیر اعظم عمران خان دے ناقابل ضمانت وارنٹ گرفتاری معطل کر دتے۔ اسلام آباد ہائی کورٹ نے توشہ خانہ فوجداری کیس وچ عمران خان دے وارنٹ منسوخی کرن دی درخواست اُتے محفوظ فیصلہ سناندیاں ہویاں اوہناں نوں13مارچ نوں سیشن عدالت وچ پیش ہون دا حکم وی جاری کر دتا اگر عمران خان 13مارچ نوں پیش نہیں ہندے تے عدالت قنون دے مطابق کارروائی کرے۔دُوجے پاسے اسلام آباد دی ڈسٹرکٹ اینڈ سیشن کورٹ دے ایڈیشنل سیشن جج ظفر اقبال نے عمران خان نوں13مارچ نوں عدالت پیش ہون دا حکم دے دتا، سابق وزیر اعظم عمران خان نوں توشہ خانہ کیس وچ فرد جرم عائد کرن لئی 13 مارچ نوں پیش ہون دی ہدایت کیتی گئی اے ،ایس توں پہلاں اسلام آباد ہائی کورٹ دے چیف جسٹس عامر فاروق نے توشہ خانہ فوجداری کیس وچ عمران خان دے ناقابل ضمانت وارنٹ گرفتاری دے خلاف درخواست اُتے سماعت کیتی ۔ عمران خان دے وکیل نے موقف اختیار کیتا کہ اوہناں دے موکل نوں 28 فروری والے دن توشہ خانہ کیس وچ سدھیا گیا، اوسی دن عمران خان نوں3 ہور عدالتاں وچ پیش ہونا سی ، عمران خان مقررہ ویلے وچ اوتھے پیش نہیں ہوسکے، جس اُتے وارنٹ جاری کردتے گئے، اینہاں وارنٹاں دی بنیاد اُتے پلس عمران خان نوں گرفتار کرن گئی۔