عمران خان نوں ہُن گرفتار کرکے لیانا پئے گا،وزیر داخلہ

اسلام آباد (پنجابی میڈیاگروپ)وفاقی وزیر داخلہ رانا ثنااللہ نے سابق وزیراعظم تے پاکستان تحریک انصاف دے چیئرمین اُتے سخت تنقید کردیاں ہویاں آکھیا اے کہ عمران خان اگر اینج دی چھپے رہے تے قنون توں نَٹھدے رہے تے اوہناں نوں گرفتار کرکے لیانا پئے گا، ٹیرن وائٹ، فارن فنڈنگ، توشہ خانہ کیساں وچ عمران خان نوں ہر ممکن ریلیف مل چکیا اے،13 مارچ دے بعد کسی قسم دی گنجائش نظر نہیں آرہی، عمران خان سیاسی سرگرمیاں لئی فٹ اے تے عدالتاں وچ وی حاضر ہونا چاہیدا اے،جنرل ریٹائرڈ فیض حمید داکورٹ مارشل وزارت داخلہ نے نہیں، جی ایچ کیو نے کرنا اے،عمران خان دے لہور برگر مارچ اُتے سکیورٹی ایجنسیاں دے خدشات اُتے نگران صوبائی حکومت نے دفعہ 144 نافذ کیتی ۔ پریس کانفرنس نال خطاب کردیاں ہویاں وزیر داخلہ نے آکھیا کہ اج ملک دے مختلف شہراں وچ عورتاں اپنے مسائل اُجاگر کرن تے اپنے حقوق لئی عورت مارچ دا انعقاد کر رہیاں نیں ، ایس دے نال ہی عورت مارچ نوں کاؤنٹر کرن لئی حیا مارچ دی سرگرمی وی کیتی جا رہی اے۔راناثناء اللہ نے آکھیا کہ لہور وچ عمرانی فتنے نے وی برگر مارچ دا اعلان کیتا ہویا اے، ایہ اوہی علاقہ اے جیتھے عورت مارچ ہو رہیا اے، حیا مارچ ہو رہیا اے، نال ہی ایسی علاقے وچ فتنہ خان نے وی مناسب سمجھیا کہ ایہ اپنے فتنے نوںوی وچ اُجاگر کرے، ایس لئی اوس نے ایہ برگر مارچ تے اوس دی ریلی دا اعلان کیتا ہویا اے ۔ اوہناں نے آکھیا کہ ایسی صورتحال وچ اُوتھے کوئی وی واقعہ ہوسکدااے کیونکہ اوہناں دے فتنہ مارچ وچ،اوہناں دے جلسیاں وچ بوہت بری صورتحال دا سامنا کرنا پیندا اے جیہڑا خود اوہناں لئی وی شرمندگی دا باعث بندی رہی اے، ایس وچ کجھ عناصر پریشانی دا باعث بنن والی صورتحال پیدا کرسکدے نیں۔ وزیر داخلہ نے آکھیا کہ ایہ ایجنسیاں دی رپورٹ سی جس دی بنیاد اُتے نگران پنجاب حکومت نے دفعہ 144 لائی اے۔رانا ثناء اللہ نے آکھیا کہ میری معلومات دے مطابق اوہناں نے آکھیاسی کہ اوہ اپنی ریلی دا روٹ فراہم کرن تے اپنے آپ نوں اوس حدود وچ رکھن دی یقین دہانی کران تاکہ مختلف سرگرمیاں دے پیش نظر اُوتھے کوئی ناخوشگوار واقعہ پیش نہ آئے۔