تحریک انصاف نے الیکشن ریلی ملتوی کر دتی، کارکناں توں گھر جان دی اپیل

لہور(پنجابی میڈیاگروپ)پاکستان تحریک انصاف نے الیکشن ریلی ملتوی کرن دا اعلان کردیاں ہویاں کارکناں نوں گھر جان دی اپیل کر دتی ۔ حماد اظہر نے میڈیا نال گل بات کردیاں ہویاں آکھیا کہ کارکن کسی صورت مشتعل نہ ہون، ایہ لوگ ملک وچ خون چاہندے نیں، کارکن پرامن طریقے نال پیچھے ہٹ جان ، اسیں کسی صورت خون خرابہ نہیں چاہندے ۔پی ٹی آئی رہنما نے آکیا کہ پُرامن ریلی اُتے حکومت نے تشدد کرایا ، رات ویلے پورا سکیورٹی پلان کلیئر ہویا سی ، پرامن الیکشن ریلی کڈنا ساڈا حق اے، پلس نے شہریاں دیاں گڈیاں نوں توڑیا، اوہناں دا سانحہ ماڈل ٹائون دا پورا ارادہ سی۔اوہناں نے آکھیا کہ 100 کارکن گرفتار نیں ، ایہ فاشزم نہیں تے ہور کیہ اے، عمران خان نے اعلی عدلیہ نال انسانی حقوق دی خلاف ورزیاں اُتے نوٹس لین دا آکھیا اے۔حماد اظہر نے آکھیا کہ مسلم لیگ (ن)دے لوگ گلی، محلیاں وچ نہیں جا سکدے، ایہ چاہندے نیں ملک وچ افراتفری پھیلے، عمران خان دی ساری جدوجہد آئین و قنون دے دائرے وچ اے، اج پی ڈی ایم ، نگران حکومت نے انتہا کر دتی ۔ اوہناں نے آکھیا کہ ساڈے وکیل نگران حکومت اتے توہین عدالت دا مقدمہ دائر کرن گے، نگران حکومت دا مقصد تے الیکشن کرانا سی، جمہوریت دے لباس وچ فاشزم اے، رانا ثنا اللہ چاہندے نیں کہ لاشاں ڈِگن، اسیں ملک وچ خون خرابہ نہیں ہون دیاں گے۔