پنجاب:30اپریل نوں عام الیکشن لئی شیڈول جاری کردتاگیا

اسلام آباد( پنجابی میڈیاگروپ)الیکشن کمیشن آف پاکستان نے پنجاب وچ عام الیکشن دا شیڈول جاری کر دتا جس دے مطابق صوبہ پنجاب وچ30 اپریل نوں الیکشن ہون گے۔شیڈول دے مطابق پنجاب وچ عام الیکشن دی پولنگ 30 اپریل نوں ہوئے گی، 11 مارچ نوں پبلک نوٹس جاری ہوئے گا، پنجاب وچ کاغذات نامزدگی 12 توں 14 مارچ تک جمع کرائے جا سکدے نیں ،الیکشن کمیشن دے شیڈول دے مطابق پنجاب وچ عام الیکشن لئی کاغذات نامزدگی دی جانچ پڑتال 22 مارچ نوں ہوئے گی، امیدواراںنوں انتخابی نشان 6 اپریل نوں جاری کیتے جان گے۔الیکشن کمیشن نے آکھیا کہ سیاسی جماعتاں نوں مخصوص نشستاں دی ترجیحی فہرست 14 مارچ تک ریٹرننگ افسر کول جمع کرانا ہوئے گی۔