ریلی اُتے شیلنگ:چیف جسٹس نوٹس لین: پرویزالٰہی

لہور(پنجابی میڈیاگروپ)سابق وزیر اعلی پنجاب چودھری پرویز الہی نال سینئر وکیلاں دے وفد نے ملاقات کیتی جس وچ پرامن پارٹی کارکناں اُتے پلس تشدد تے گرفتاریاںدی شدید مذمت کیتی گئی۔ایس موقع اُتے گل بات کردیاں ہویاں پاکستان تحریک انصاف دے صدر چودھری پرویز الہی نے آکھیا کہ عمران خان مظلوم دی آواز نیں، حکومت دے دن گنے جا چکے نیں، عوام دے احتجاج نے ثابت کر دتا کہ ایہ الیکشن توں کنا ڈر چکے نیں، عمران خان دی قیادت وچ عوامی طاقت نوںروکنا نااہل ٹولے دے وَس دی گل نہیں۔چودھری پرویز الہی نے ہورآکھیا کہ پنجاب حکومت دی بد ترین فسطائیت نے ایس دا مکروہ چہرہ بے نقاب کر دتا، پنجاب وچ آئینی تے قنونی حقوق نوں کچلن لئی پلس دا بدترین استعمال جاری اے، پنجاب حکومت ولوں آنسو گیس، لاٹھی چارج دا بدترین استعمال قابل مذمت اے۔سابق وزیر اعلی پنجاب تے تحریک انصاف دے صدر نے آکھیا پلس نے گلو بٹ دا کردار ادا کیتا ، پی ٹی آئی دے رہنماواں تے کارکناں دیاں گڈیاں توڑیاں، چیف جسٹس توں اپیل اے کہ پنجاب وچ ہون والی لاقانونیت دا نوٹس لین، انتخابی شیڈول آ چکیا اے مگر الیکشن ریلی دی اجازت نہیں دتی جا رہی۔