ڈیفالٹ دا خطرہ مُک گیا، ملک ترقی کرے گا، آرمی چیف

اسلام آباد( پنجابی میڈیاگروپ)آرمی چیف جنرل سید عاصم منیر نے ملک دی10 سرکردہ کاروباری شخصیتاں نال ملاقات کیتی تے وزیر خزانہ اسحاق ڈاردی موجودگی وچ اوہناں نوں یقین دہانی کرائی کہ پاکستان مشکل معاشی حالات توں کامیابی نال باہر نکل آئے گا ڈیفالٹ دا خطرہ ٹل چکیا اے، ملک ترقی کرے گا تے اسیں اک خوشحال قوم بن کے اُبھراں گے۔ملاقات دے حوالے نال باضابطہ طور اُتے کوئی بیان سامنے نہیں آیا لیکن ذرائع دا کہنا اے کہ آرمی چیف پوری ملاقات دے دوران پرامید نظر آئے تے ایس اعتماددا اظہار کیتا کہ موجودہ معاشی مشکلاں اُتے قابو پا لیا جائے گا۔اوہناں نے کاروباری افراد نوں آکھیا کہ اوہ پرعزم تے پراعتماد رہن، آرمی چیف نے مختلف شعبیاں نال تعلق رکھن والے کاروباری افراد نوں دسیا کہ قوم اُتے مشکلاں آندیاں نیں تے ساہنوں مشکل حالات دا سامنا اے لیکن بدتر حالات نوں اسیں پیچھے چھڈ چکے ہاں تے اسیں قائم و دائم رہواں گے۔جنرل عاصم نے اسلامی تعلیم دا حوالہ دتا تے رَِلتیاں نوں یقین کرایا کہ پاکستان موجودہ امتحان وچ کامیاب ہو جائے گا۔