موجودہ حکمران مشرف دے دور توں اگے نکل گئے نیں،عمران خان

لہور(پنجابی میڈیاگروپ) پاکستان تحریک انصاف دے چیئرمین عمران خان نے آکھیا اے کہ موجودہ حکمران جنرل مشرف دے دور توں اگے نکل گئے نیں اوہ دور اج دے دورتوں بہتر سی ،اج اسیں آزاد قوم نہیں ہاں، کارکناں توں اپیل کردا ہاں کہ کسی انتشار وچ رَلتی نہ ہون تاکہ اوہناں نوں الیکشن توں نٹھن دا کوئی موقع نہ ملے ،سپریم کورٹ توں کہنا چاہندا ہاںتہاڈے لئی چیلنج اے، اوہناں نے ماضی وچ وی عدلیہ نوں تقسیم کیتا ، موجودہ سپریم کورٹ وچ وی ایہی نظر آرہیا اے ،ایہ صرف الیکشن توں نکلن لئی اینج کر رہے نیں، میں ادب نال سپریم کورٹ دے ججاں نوں کہہ رہا ہاں کہ ملک دی خاطر تقسیم نہ ہون ، تریخ سب ویکھ رہی اے ایہ فیصلہ کن موڑ اے ایس ویلے اینج داکوئی قدم نہ چُکیا جائے جس نال جمہوریت ،آئین تے قنون دی حکمرانی کمزور ہوئے ۔ ویڈیو لنک ذریعے اپنے بیان وچ عمران خان نے آکھیا کہ پلس نے آنسو گیس تے واٹر کینن دے استعمال نال لہور وچ جس طرح دا محول بنایا اے اوس نال اینج لگ رہیا اے کہ جِداں ایہ پاکستان نہیں مقبوضہ کشمیر اے ، اسین آئین دے مطابق اپنی حکومت تحلیل کر کے سپریم کورٹ گئے تے آئین کہندا اے کہ 90دناں وچ الیکشن ہونے نیں ،الیکشن وچ50دن باقی رہ گئے نیں جس پاروںاسیں انتخابی مہم لئی ریلی دا اعلان کردے ہاں، اک دن پہلاںاسیں پلس دے نال بیٹھ کے ریلی دے روٹ نوں حتمی شکل دتی ، بدھ والے دن ریلی وچ رلتی ہون لئی لوگ آرہے نیں لیکن پلس ساہنوں اینج روکدی اے جِداں اسیں کوئی ات گرد نکل رہے ہاں