حکومت الیکشن کران دے موڈ وچ نہیں،شیخ رشید

لہور(پنجابی میڈیاگروپ)سربراہ عوامی مسلم لیگ تے سابق وفاقی وزیر داخلہ شیخ رشید احمد نے آکھیا اے کہ پنجاب وچ الیکشن شیڈول دا اعلان خوش آئند اے، خدا کرے موخر نہ ہون ۔ اوہناں نے سماجی رابطے دی ویب سائٹ ٹوئٹر اُتے اپنے پیغام وچ لکھیا کہ بظاہر حکومت الیکشن کران دے موڈ وچ نہیں، ایہ توہین عدالت دا وڈا رسک لین جا رہی اے، ہُن آن والے دناں وچ سیاست دے فیصلے عدالتاں وچ ہون گے، حکومت سیاسی تے معاشی استحکام نہیں صرف اپنے ذاتی مفاد نوں ویکھ رہی اے۔ اوہناں نے آکھیا کہ نگران حکومتاں منتخب حکومتاں توں دو ہتھ اگے چلیاں گئیاں، اوہناں دا کم صرف الیکشن کرانا اے، من پسند رستہ بنانا نہیں، عمران خان تے تحریک انصاف نوں رُوکن دا ہر کم حکومت دے گلے اُلٹا پیندا اے، پیمرا دیاں پابندیاں قوم نوں ٹیلی ویژن دی بجائے سوشل میڈیا اُتے لے جان گیاں ۔ سابق وفاقی وزیر دا کہنا سی کہ پی ٹی آئی دی پہلے دن الیکشن مہم وچ اک کارکن جاں بحق ہوگیا، جس دن انتخابی شیڈول آ رہیا اے، اوسی دن دفعہ 144 لائی جا رہی اے۔