حکومت مینوں گرفتار یا نااہل کرن توں بعد الیکشن کروانا چاہندی اے:عمران خان

لہور( پنجابی میڈیاگروپ)چیئرمین پاکستان تحریک انصاف عمران خان نال سینئر صحافیاں نے اوہناں دی رہائش گاہ زمان پارک وچ ملاقات کیتی ۔ایس موقع اُتے گل کردیاں ہویاں سابق وزیر اعظم نے آکھیا کہ8 مارچ دے واقعات 25 مئی دا پارٹ ٹوسی ، اوہی افسر کل دے واقع وچ ملوث نیں جیہڑے25 مئی نوں سن، اوہناں دا پلان ایہ اے کہ عمران خان گرفتار ہوئے یا نااہل فیر ہی الیکشن کراواں گے، مینوں نااہل یا گرفتار کرن میچ اسیں جت چکے ہاں، ایہ زبردستی گرائونڈ وچ کھیڈ رہے نیں، ایہ الیکشن توں نَس رہے نیں ۔ چیئرمین تحریک انصاف عمران خان نے آکھیا کہ میرے اُتے حملے دی کوشش کر رہے نیں، دفعہ 144 ختم ہوگئی اے اسیں دوبارہ سڑکاں اُتے نکلاں گے، اسیں چھیتی انتخابی جلسے شروع کرن جا رہے ہاں، اوہناں دا پلان اے کہ عدلیہ نوں تقسیم کر کے چیف جسٹس دے خلاف مہم چلائیے، ایہ منصوبہ کَدی کامیاب نہیں ہون دیاں گے، ایہ الیکشن نہیں کروانا چاہندے۔اوہناں نے آکھیا90دناں وچ الیکشن نہ ہوئے تے ملک وچ آئین تے قنون نہیں رہے گا، کَدی آرمی چیف نال ملاقات دا نہیں آکھیا ، چوراں نال کوئی گل بات نہیں ہوئے گی لیکن الیکشن لئی گل بات کرن نوں تیار ہاں، جس انداز نال پرچے درج ہو رہے نیں لگدا اے میرے خلاف مقدمیاں دی سنچری چھیتی مکمل کرن والے نیں، مریم نواز تے بلاول بھٹو دی پرورش کرپشن دے پیسے نال ہوئی اے۔