سپریم کورٹ نے آئین دی حفاظت کیتی:عمران خان

اسلام آباد(پنجابی میڈیا گروپ)چیئرمین تحریک انصاف عمران خان نے آکھیا اے کہ سپریم کورٹ دا فیصلہ چنگی گل اے،عدالت عظمیٰ نے آئین دی حفاظت کیتی اے۔سپریم کورٹ دا پنجاب وچ الیکشن14مئی نوں کران دے حوالے نال فیصلہ آن دے بعد تحریک انصاف دے مرکزی رہنما فواد چودھری نے سابق وزیر اعظم عمران خان نال فون اُتے رابطہ کر کے آگاہ کیتا ۔فواد چودھری نے سپریم کورٹ فیصلے دے مختلف پہلوؤاں اُتے چیئرمین پی ٹی آئی عمران خان نوں بریفنگ دتی، ایس دوران گل بات کردیاں ہویاں عمران خان نے آکھیا کہ تحریک انصاف سپریم کورٹ دے فیصلے پیچھے کھڑی اے، پوری قوم الیکشن دی تیاری کرے۔ایس توں پہلاں امریکی جریدے نوں انٹرویو دیندیاں ہویاں سابق وزیر اعظم عمران خان نے آکھیا کہ سیاسی اداریاں وچ الیکشن دے بعد نویں سماجی معاہدے دی لوڑ اے، ساڈی معیشت زبوں حالی دا شکار ہو چکی اے تے اسیں تریخ دے بدترین معاشی بحران توں لنگ رہی اے۔سابق وزیر اعظم عمران خان نے آکھیا کہ پاکستان وچ سیاسی استحکام الیکشن ذریعے آئے گا تے ایتھے معاشی بحالی دا سفر شروع ہُندا اے، مینوں دوبارہ اقتداروچ نہ لیان دا فیصلہ کر لئیا گیا اے، کیا اوہناں دے کول ملک نوں بحران توں کَڈن دا کوئی منصوبہ اے۔چیئرمین تحریک انصاف عمران خان نے موجود معاشی صورتحال تے الیکشن دے بعد دوبارہ حکومت وچ آن دے منصوبیاں بارے گل کردیاں ہویاں آکھیا کہ طاقت دا منبہ سیاسی ادارے ہون، ایہ یقینی بنان لئی نویں سماجی معاہدے دی لوڑ اے ۔ اوہناں نے ہور آکھیا کہ جنہاں لوکاں نے مینوں مارن دی کوشش کیتی اوہ اجے وی اقتدار وچ بیٹھے نیں تے اوہ گھبرائے ہوئے نیں کہ اگر میں واپس آیا تے اوہناں دا احتساب کیتا جائے گا، اوہ پریشان نیں کہ مینوں کِنج باہر رکھیا جائے کیونکہ لوگ مینوں واپس لیانا چاہندے نیں۔