سپریم کورٹ دا14مئی نوں پنجاب وچ الیکشن داحکم

اسلام آباد(پنجابی میڈیا گروپ)سپریم کورٹ آ ف پاکستان نے پنجاب تے کے پی وچ الیکشن ملتوی ہون دے خلاف پاکستان تحریک انصاف دی درخواست اُتے سپریم کورٹ نے الیکشن کمیشن دا22مارچ دا فیصلہ کالعدم قرار دیندیاں ہویاں14مئی نوں پنجاب وچ الیکشن کران دا حکم دے دتاجدکہ عدالت عظمیٰ نے ہدایت کیتی اے کہ وفاقی حکومت10اپریل تک21ارب روپے جاری کرے،امیدواراں دی حتمی فہرست19اپریل تک جاری کیتی جائے،انتخابی نشان20اپریل نوں الاٹ کیتے جان،14 مئی نوں پنجاب اسمبلی دے الیکشن کروائے جان،نگران حکومت، آئی جی تے چیف سیکرٹری پنجاب سیکیورٹی دی فراہمی یقینی بنائے،الیکشن کمیشن دے غیر قنونی فیصلے نال13دن ضائع ہوئے، آئین و قنون الیکشن کمیشن نوں تریخ وچ توسیع دی اجازت نہیں دیندا، الیکشن کمیشن نے الیکشن دی8اکتوبر دی تریخ دے کے دائرہ اختیارتوں تجاوز کیتا،وفاقی حکومت ولوں اگر الیکشن کمیشن دی معاونت نہ کیتی جاندی تے الیکشن کمیشن ساہنوں آگاہ کرے،ججاں دے نوٹ وچ4،3دے تناسب والا معاملہ قنون دے خلاف اے، جسٹس فائزعیسٰی تے امین الدین خان دے فیصلے دی کوئی قنونی حیثیت نہیں۔ منگل نوں چیف جسٹس پاکستان جسٹس عمر عطا بندیال دی سربراہی وچ جسٹس اعجاز الاحسن تے جسٹس منیب اختر اُتے مشتمل 3رکنی بینچ ولوں پچھلے دناں سماعت مکمل ہون دے بعد محفوظ کیتا گیا فیصلہ سنایا گیا۔چیف جسٹس پاکستان عمر عطا بندیال نے قرآن دی آیت توں ابتدائی فیصلہ سنان دا آغاز کیتا، فیصلہ سناندیاں ہویاں چیف جسٹس نے آکھیا کہ تفصیلی فیصلہ بعد وچ جاری کیتا جائے گا۔ فیصلے وچ آکھیا گیا کہ الیکشن کمیشن دا22مارچ دا فیصلہ غیر آئینی قراردتا جاندا اے،صدر مملکت دی دتی گئی تریخ دا فیصلہ بحال کیتا جاندا اے،آئین وقنون الیکشن دی تریخ ملتوی کرن دا اختیارنہیں دیندا،22 مارچ نوں الیکشن کمیشن نے فیصلہ دتا تَد انتخابی عمل پنجویں مرحلے اُتے سی، الیکشن کمیشن دے آرڈر پاروں13 دن ضائع ہو گئے، الیکشن کمیشن نے غیر آئینی فیصلہ کیتا۔سپریم کورٹ نے قرار دتا کہ الیکشن کمیشن نے الیکشن دی 8 اکتوبر دی تریخ دے کے دائرہ اختیار توں تجاوزکیتا، ریٹرننگ افسر دے فیصلے خلاف اپیلاں جمع کران دی آخری تریخ 10اپریل ہوئے گی، 17 اپریل نوں الیکشن ٹریبونل اپیلاں اُتے فیصلہ کرے گا، پنجاب وچ امیدواراں دی حتمی فہرست 18 اپریل نوں شائع کیتیاں جان، انتخابی نشان 20 اپریل تک الاٹ کیتے جان۔سپریم کورٹ نے حکم دتا کہ پنجاب وچ الیکشن شفاف، غیرجانبدارانہ تے قنون مطابق کرائے جان، وفاقی حکومت 10 اپریل تک الیکشن کمیشن نوں 21 ارب روپے دا فنڈ جاری کرے، الیکشن کمیشن 11 اپریل نوں سپریم کورٹ وچ فنڈ مہیا کرن دی رپورٹ جمع کرائے، الیکشن کمیشن فنڈ دی رپورٹ بینچ ممبراںنوں چیمبر وچ جمع کرائے، فنڈ نہ ملن دی صورت وچ سپریم کورٹ متعلقہ حکام نوں ہدایت جاری کرے گا۔