شریف، زرداری مافیا عوام دے انتقام لئی تیار رہے‘شیخ رشید

لہور(پنجابی میڈیاگروپ)سربراہ پاکستان عوامی مسلم لیگ وسابق وفاقی وزیر داخلہ شیخ رشید احمد ہوراں آکھیا اے کہ شریفاں، زرداریاں دا قبضہ مافیا عوام دے انتقام لئی تیار رہے، اگر ملک وچ آئین و قنون دی حکومت نہ ہوئی ،سپریم کورٹ دے فیصلے اُتے عمل نہ ہویا تے ریاست وچ بغاوت دے مترادف ہوئے گا۔سماجی رابطے دی ویب سائٹ ٹوئٹر اُتے اپنے بیان وچ شیخ رشیددا کہنا سی کہ رجسٹرار نوں ہٹانا، بنچ بنانا، سوموٹو لینا چیف جسٹس دا آئینی حق اے، اک پاسے ججاں دے بائیکاٹ دا اعلامیہ جاری کردے نیں، دُوجے پاسے عدالت وچ دلائل دین دی بھیک منگدے نیں ۔ سابق وفاقی وزیر نے آکھیا کہ قوم عدلیہ دے نال کھڑی اے، سڑکاں اُتے آگئی تے ہر چیز وِکھر جائے گی، قوم پہلاں ہی ٹٹ پھوٹ دا شکار اے، شریفاں، زرداریاں دا قبضہ مافیا عوام دے انتقام لئی تیار رہے۔