سپریم کورٹ آف پاکستان دا گورنر اسٹیٹ بینک نوں الیکشن کمیشن نوں براہ راست فنڈز جاری کرن دا حکم

اسلام آباد (پنجابی میڈیا گروپ)پنجاب وچ الیکشن لئی فنڈز دے اجرا دے معاملے اُتے حکومت نے سپریم کورٹ آف پاکستان وچ مؤقف اختیار کیتا اے کہ پارلیمان توں بل مسترد ہون دے بعد وفاقی حکومت کول فنڈ جاری کرن دا اختیار نہیں جدکہ سپریم کورٹ نے پنجاب وچ الیکشن لئی قائم مقام گورنر اسٹیٹ بینک نوں الیکشن کمیشن نوں براہ راست فنڈز جاری کرن دا حکم دے دتا۔جمعہ نوں چیف جسٹس عمر عطا بندیال، جسٹس منیب اختر تے جسٹس اعجاز الاحسن نے ان چیمبر سماعت کیتی جیہڑی اک گھنٹہ 20 منٹ تک جاری رہی، ایس دوران اٹارنی جنرل تے ہور حکام پیش ہوئے۔سماعت وچ وزارت خزانہ دے آسپیشل سیکرٹری اویس منظور سمرا، ایڈیشنل سیکرٹری عامر محمود ، ایڈیشنل سیکریٹری تنویر بٹ دے علاوہ اسٹیٹ بینک دی قائم مقام گورنر سیما کامل پیش ہوئیاں جدکہ وفاقی حکومت دی نمائندگی اٹارنی جنرل نے کیتی۔اٹارنی جنرل، وزارت خزانہ تے اسٹیٹ بینک ولوں عدالت نوں بریفنگ دتی گئی۔وفاقی حکومت ولوں ان چیمبر سماعت دوران جمع کرائے گئے تحریری مؤقف وچ آکھیا گیا کہ حکومت نے عدالتی احکامات اُتے عمل کر دتا اے۔دستاویز مطابق حکومت نے آکھیا کہ فیڈرل کنسولیڈیٹڈ فنڈ توں پیسے جاری کرن لئی ایکٹ آف پارلیمنٹ دی لوڑ ہُندی اے لیکن ایکٹ آف پارلیمنٹ لئی پیش کردہ بل پارلیمان نے مسترد کر دتا اے۔تحریری جواب وچ آکھیا گیا کہ بل مسترد ہون دے بعد وفاقی حکومت دے کول فنڈ جاری کرن دا اختیار نہیں ایس لئی وفاقی حکومت اسٹیٹ بنک نوں فنڈ جاری کرن دا حکم نہیں دے سکدی البتہ وفاقی حکومت نے عدالتی حکم تحت اپنی قنونی ذمہ داری پوری کر دتی اے۔اٹارنی جنرل فار پاکستان منصور عثمان اعوان نے حکومتی مؤقف توں آگاہ کردیاں ہویاں دسیا کہ وفاقی حکومت الیکشن لئی فنڈزدے اجرا وچ بے بس اے۔اوہناںں نے آکھیا کہ پارلیمنٹ نے حکومت نوں فنڈز جاری کرن دا اختیار ہی نہیں دتا تے فنڈز کِنج جاری کرن ۔ سیکرٹری الیکشن کمیشن نے وی عدالت نوں پنجاب اسمبلی الیکشن بارے پیش رفت توں آگاہ کیتا۔سیکرٹری الیکشن کمیشن نے عدالت نوں دسیا کہ حکومت نے فنڈز فراہم نہیں کیتے تے نگران حکومت پنجاب نے سیکیورٹی فراہمی دی یقین دہانی وی نہیں کروائی۔