90دناں بعد نگراں وزیر اعلی پنجاب کوئی ایگزیکٹیو آڈر پاس نہیں کر سکن گے‘ فواد چودھری

لہور (پنجابی میڈیاگروپ) پاکستان تحریک انصاف دے مرکزی سینئر نائب صدر فواد چودھری نے آکھیا اے کہ پنجاب دے نگراں وزیر اعلی نوں 22اپریل نوں 90دن پورے ہو جان گے، 23اپریل نوں اوہ کوئی چیک سائن کر سکدے نیں نہ ایگزیکٹیو آرڈر پاس کر سکدے نیں ۔ میڈیا نال گل بات کردیاں ہویاں فواد چودھری نے آکھیا کہ ریفرنس ڈرافٹ کر رہے ہاں جیہڑا الیکشن کمیشن نوںگھل دیاں گے، الیکشن کمیشن توں آکھاں گے کہ نگراں حکومت لئی سپریم کورٹ توں توسیع لین یا نوا وزیر اعلیٰ وکابینہ بنان ۔ اوہناں نے آکھیا کہ عمران خان دی مقبولیت دا عروج پارلیمنٹ توں استعفے تے اسمبلیاں توڑن اُتے اے، الیکشن 90دناں توں آگے نہیں جا سکدے۔اوہناں نے ہور آکھیا کہ بے نظیر بھٹو دی شہادت اُتے اتفاق رائے نال الیکشن ملتوی ہویا، معاملہ عدالت وچ نہیں گیا، عمران خان کس لئی گرفتاری دین، اوہناں اُتے کوئی کیس ہی نہیں۔