عوام طاقت دی محور، اوہناں دی رائے پارلیمان تے آئین پاکستان اے، آرمی چیف

اسلام آباد( بیورورپورٹ)آرمی چیف جنرل عاصم منیر نے آکھیا اے کہ پاکستان دی عوام طاقت دا محور اے، عوام دی رائے پارلیمان تے آئین پاکستان اے۔قومی اسمبلی دی نیشنل سکیورٹی کمیٹی دا ان کیمرہ اجلاس سپیکر قومی اسمبلی دی زیر صدارت جاری اے، اجلاس وچ آرمی چیف جنرل سید عاصم منیر نے 1973 دے آئین دے نفاذدے50 سال مکمل ہون اُتے پارلیمنٹ تے ارکان نوں مبارک دتی ۔ ذرائع مطابق آرمی چیف جنرل سید عاصم منیرنے آکھیا کہ آئین پاکستان تے پارلیمنٹ عوام دی رائے دا مظہر اے، عوام اپنی رائے آئین تے پارلیمنٹ ذریعے استعمال کردے نیں، حاکمیت اعلی اللہ تعالی دی اے، اللہ تعالی دے ایس حکم نال ہی آئین نوں اختیار ملیا اے۔آرمی چیف جنرل نے آکھیا کہ آئین کہندا اے کہ اختیار عوام دے منتخب نمائندیاں ذریعے استعمال ہوئے گا، اوہناں نے 1973دا آئین بنان والیاں نوں وی خراج تحسین پیش کیتا ۔ اجلاس وچ رَلتی وزیراعظم شہباز شریف نے فوج، رینجرز، پلس تے ہور اداریاں دے افسراں تے جواناں نوں خراج تحسین پیش کردیاں ہویاں آکھیا کہ پاکستان نے اَت گردی خلاف جدوجہد وچ 80 ہزار توں وَدھ قربانیاں دتیاں، ساڈے شہیداں دیاں عظیم قربانیاں نال امن بحال ہویا سی، ایہ محنت 4 سال وچ ضائع کر دتی گئی ۔ شہباز شریف نے آکھیا کہ ملک وچ ات گردی واپس کیوں آئی، کون لیایا ؟ ساریاں صوبیاں نے ات گردی دے خاتمے لئی رقم دتی اوہ کیتھے گئی، ساریاں صوبیاں نے فاٹا اصلاحات دے مقاصد لئی رقم دتی سی، اوہ کیتھے گئی؟وزیراعظم دا کہنا سی کہ خیبرپختونخوا نوں دتے جان والے ارباں روپے دے وسائل کیتھے استعمال ہوئے؟ اوہناں دا جواب لینا ہوئے گا۔