لہور ہائیکورٹ دا 1947ء توں 2001ء تک دا توشہ خانہ ریکارڈ پیش کرن داحکم

لہور( پنجابی میڈیا گروپ) لہور ہائیکورٹ نے حکومت نوں1947ء توں 2001ء تک دا توشہ خانہ ریکارڈ پیش کرن دا حکم دے دتا۔ہائیکورٹ دے جسٹس شاہد بلال حسن دی سربراہی وچ 2رکنی بینچ نے توشہ خانہ تحفیاں بارے1990ء توں2001ء تک دا ریکارڈ پبلک کرن دے فیصلے خلاف حکومتی اپیل اُتے سماعت کیتی۔دوران سماعت ڈپٹی اٹارنی جنرل نصر احمد دا کہنا سی کہ 1947ء توں 1990ء تک توشہ خانہ داریکارڈ دستیاب نہیں اے جدکہ عدالت نے آکھیا کہ پہلاں حکم اُتے عمل کیتا جائے ایس حکم اُتے مکمل طور اُتے قائم ہاں، ایہ کِنج ممکن اے کہ ایس عرصے داریکارڈ نہیں رکھیا، ایہ تاں ریاست دا اثاثہ نیں، ریکارڈ نہ ہون دا سُن کے دُکھ ہویا اے، ایہ گل ہضم نہیں ہو رہی کہ ریکارڈ نہیں اے۔لہور ہائیکورٹ دے 2 رکنی بینچ نے آکھیا کہ راتوں رات بل منظور ہو جاندے نیں تے جس لئی بل پاس ہونے چاہیدے اوہ ہُندے ہی نہیں، آن والی نسل لئی کیہ چھڈیا، پہلی نسل نے پاکستان بنایا لیکن دُوجی نسل نے کجھ نہیں کیتا، بالاں نوں کیہ دینا اے۔