لاڈلے نوں 2018وچ دھاندلی ذریعے نہ لیایا جاندا تے اج پاکستان بوہت اگے جا چکیا ہُندا، نوازشریف

مدینہ منور (پنجابی میڈیا گروپ)پاکستان مسلم لیگ (ن)دے قائد سابق وزیراعظم محمد نوازشریف نے آکھیا اے کہ لاڈلے نوں 2018 وچ دھاندلی ذریعے نہ لیایا جاندا تے اج پاکستان بوہت اگے جا چکیا ہُندا ،2013 وچ اقتدار وچ آن دے بعد پاکستان نوں مشکلاں توں کڈیا ، عمران خااوہناں دے4سالہ دور وچ لوگ بد حال ہوئے ، مسلم لیگ (ن)ہی عوام تے ملک نوں مشکلاں توں کَڈے گی ، مسلم لیگ (ن)عوام دی جماعت اے ، چاہندے ہاں کہ پورے ملک وچ اک ہی دن الیکشن ہون تاکہ پاکستان نوں دوبارہ ترقی دی راہ اُتے لیایا جاسکے ۔اوہ ایتھے سابق وفاقی وزیر مذہبی امور تے چیئرمین صوبہ ہزارہ تحریک سردار محمد یوسف تے مرکزی کو آرڈی نیٹر پروفیسر حافظ سجاد قمر دے اعزاز وچ اپنے ولوں دتی گئی دعوت افطاردے موقع اُتے گل بات کررہے سن ۔ اوہناں نے دوناں رہنماواں نوں عمرہ ادائیگی دی مبارکباد وی دتی ۔ایس موقع اُتے دوناں رہنماواں نے وی نوازشریف نوں عمرہ ادائیگی اُتے مبارک باد دتی جس اُتے میاں نوازشریف نے ا وہناں دا شکریہ ادا کیتا۔ایس موقع اُتے وفاقی وزیر خزانہ اسحاق ڈار، حسین نواز،سہیل ضیاء بٹ سنے ہور فیملی ممبر موجود سن۔ایس موقع اُتے گل کردیاں ہویاں سابق وزیراعظم محمد نوازشریف نے آکھیاکہ2018وچ لاڈلے نوں دھاندلی ذریعے لیایا گیا تے ایس نکام تجربہ دا خمیازہ عوام بھگت رہی اے۔