90 دناں وچ الیکشن آئینی شق اے، ایس اُتے لچک نہیں وکھا سکدے،شاہ محمود

ملتان (پنجابی میڈیا گروپ)پاکستان تحریک انصاف دے وائس چیئرمین شاہ محمود قریشی نے آکھیا اے کہ اسیں مذاکرات توں کَدی انکار نہیں کیتا، خیبر پختونخوا تے پنجاب دا فیصلہ آئینی نوعیت دا اے، مذاکرات آئین دے فریم ورک اندر ہون گے، 90 دناں دے اندر الیکشن آئین ہی دی شق اے، ایس اُتے اسیں کوئی لچک وکھا نہیں سکدے ۔ میڈیا نال گل کردیاں ہویاں شاہ محمود قریشی نے آکھیا کہ اسیں سیاسی لوگ ہاں، سیاسی لوگ گفت وشنیدکردے نیں، سیاسی جماعت کَدی مذاکرات توں کتراندی نہیں، مذاکرات دی حدود قیود ہُندی اے،اسیں ہمیشہ آکھیا اے کہ مذاکرات لئی تیار ہاں۔ شاہ محمود قریشی نے آکھیاکہ مذاکرات آئین دے اندر رہندیاں ہویاں ہون گے، آئین نال ماورا نہیں ہوسکدے، 90 دناں اندر الیکشن آئین ہی دی شق اے، ایس اُتے اسیں کوئی لچک وکھا نہیں سکدے، اوہ تاں آئین توں روگردانی ہوئے گی، بلوچستان، سندھ تے قومی اسمبلی دے معاملے اُتے بیٹھ کے گل کرسکدے ہاں۔