سپریم کورٹ دے حکم مطابق14مئی نوں ہر صورت الیکشن کراناہون گے،فواد چوہدری

لہور(پنجابی میڈیاگروپ)پاکستان تحریک انصاف دے مرکزی سینئر نائب صدر فواد چوہدری نے آکھیا اے کہ سپریم کورٹ دے حکم مطابق 14مئی نوں ہر صورت الیکشن کرانا ہون گے تے اگر ایہ نہیں ہوئے گا تے فیر سڑکاں اُتے دمادم مست قلندر ہوئے گا ،پنجاب تے کے پی اسمبلیاں دے الیکشن اتے گل بات دا ویلا لَنگ چکیا اے البتہ قومی الیکشن دے فریم ورک اُتے گل بات ہو سکدی اے ،اگر سپریم کورٹ دے حکم اُتے عمل نہیں ہُندا تے پہلاں قائمقام گورنر اپنے گھر جان گے تے اوہناں6مہینے قیددی سزا وی سنائی جا سکدی اے دُوجے پاسے جیہڑاکھیڈ کھیڈیا جارہیا اے اوہ لندن پلان دا حصہ اے تے اوہ ایہ اے کہ نواز شریف تے مریم نواز نے شہباز شریف نوں نا اہل کرانا اے، مسلم لیگ (ن) دا ایہ وی خیال اے کہ شاید شہباز شریف دی قربانی توں انیہاں نوں کوئی بیانیہ مل جائے ،نگران حکومت دے خلاف ریفرنس تیاری دے آخری مراحل وچ اے ،صدر مملکت توںدرخواست کیتی اے اوہ ریفرنس اگے گھلن تے اگر اوہناں نے نہ گھلیا تے اج یا کل (منگل یا بدھ)سپریم کورٹ وچ184تھری دی پٹیشن دائر کر رہے ہاں جس وچ درخواست ایہ اے کہ نگران حکومت تے الیکشن کمیشن اپنی ذمہ داریاں ادا کرن وچ نکام ہو گئے نیں تے کر سپریم کورٹ آرٹیکل187 تحت ایڈ منسٹریٹر مقرر کرے جیہڑے الیکشن کران لئی روزانہ دی بنیاد معاملات نوںویکھے۔پارٹی دی مرکزی رہنما مسرت جمشید چیمہ دے ہمراہ لہور ہائیکورٹ وچ مختلف کیساں دی پیروی دے بعد میڈیا نال گل بات کردیاں ہویاں ایہ اطلاع نیں کہ عید دیاں چھٹیاں وچ زمان پارک وچ اک آپریشن کیتا جارہیا اے تے ایس حوالے نال لہور ہائیکورٹ دے فل بنچ وچ درخواست دائر کیتی اے تے ساہنوں امید اے انصاف ملے گا۔