سراج الحق دے مذاکرات حقیقت اُتے مبنی ہون تاں چنگی گل اے‘ شیخ رشید احمد

لہور( پنجابی میڈیاگروپ)سابق وزیر داخلہ شیخ رشید احمد نے آکھیا اے کہ سراج الحق دے مذاکرات حقیقت اُتے مبنی ہون تے چنگی گل اے، ہُن تے زلمے خلیل زاد نے وی مسٹرٹین پرسنٹ اُتے مہرلا دتی اے ، نیب دے کیس سپریم کورٹ وچ فیصلہ طلب نیں ،انشااللہ سپریم کورٹ نیب ترمیم نوں کالعدم قراردیوے گی ۔ ٹوئٹر اُتے جاری اپنے بیان وچ اوہناں نے آکھیا کہ عدلیہ نوں دھمکیاں وی دتیاں جارہیاں نیں تے اوہناں دے خلاف غیراخلاقی مہم وی چلائی جارہی اے، اگرقومی اسمبلی تحلیل نہ ہوئی تے صوبائی الیکشن اپنے ویلے اُتے ہی ہو کے رہن گے۔ اوہناں نے آکھیا کہ وزیر داخلہ دابیان کہ14مئی نوں الیکشن نہیں ہون گے عدلیہ دے فیصلے دی سرعام حکم عدولی اے،چور دروازے آن والی پی ڈی ایم حکومت الیکشن لئی چوک تے چوراہے وچ جان توں گھبرا رہی اے ، نگران حکومت دے90دن پورے ہوگئے نیں تے ایہ کس شوق کس اختیار تحت بیٹھے ہوئے نیں۔اوہناں نے آکھیا کہ حالات ایہ نیں کہ غیرملکی سرمایہ کاری تے غیرملکی ائیر لائناں بند ہورہیاں نیں۔