سپریم کورٹ نے پنجاب وچ الیکشن دا کیس کل سماعت لئی مقرر کر دتا

اسلام آباد(پنجابی میڈیاگروپ)سپریم کورٹ دا3رکنی بینچ پنجاب وچ الیکشن دے حوالے نال کیس دی سماعت کل سویرے11:30 وجے کرے گا،رجسٹرار سپریم کورٹ ولوں نویں کاز لسٹ جاری کردتی گئی۔چیف جسٹس آف پاکستان جسٹس عمر عطا بندیال دی سربراہی وچ جسٹس اعجاز الاحسن تے جسٹس منیب اختر الیکشن دے حوالے نال کیس دی سماعت کرن گے، ایس حوالے نال سپریم کورٹ نے کاز لسٹ جاری کر دتی اے، چیف جسٹس عمر عطا بندیال کل معمول دے کیساں دی سماعت نہیں کرن گے۔واضح رہے چیف جسٹس آف پاکستان جسٹس عمر عطا بندیال دی طبیعت ناساز ہون اُتے اج کیساں دی سماعت کرن والا بینچ اچانک ڈی لسٹ کر دتا گیا سی جس پاروں بینچ سامنے سماعت لئی مقرر ساریاں مقدمیاں نوں وی ڈی لسٹ کر دتا گیا، رجسٹرار سپریم کورٹ نے نوٹیفکیشن جاری کیتا۔ڈی لسٹ ہون والے بینچ نے اج 12اہم مقدمیاں دی سماعت کرنی سی، بینچ نمبر ون ڈی لسٹ ہون دے بعد بینچ نمبر2دے مقدمیاں دی فہرست وی منسوخ کر دتی گئی، جسٹس سردار طارق مسعود تے جسٹس شاہد وحید اُتے مشتمل بینچ دی کاز لسٹ وی منسوخ کردتی گئی۔