الیکشن اک نہیں ساریاں جماعتاں دی مرضی نال ہوئے گا:سراج الحق

گجرات(پنجابی میڈیا گروپ)امیر جماعت اسلامی سراج الحق نے آکھیا اے کہ الیکشن اک جماعت نہیں ساریاں سیاسی جماعتاں دی مرضی نال ہی ہوئے گا۔گجرات وچ گل بات کردیاں ہویاں امیر جماعت اسلامی سراج الحق نے آکھیا کہ اک پارٹی نے وڈے ڈاکو کہن والیاں نوں اپنی پارٹی دا صدر بنا دتا، اک جماعت نے مد مقابل نوں سڑکاں اُتے گھسیٹن دا دعوی کر کے ملک دا وزیر اعظم بنا دتا ا۔سراج الحق نے آکھیا کہ سیاسی جماعتاں ملک دی بہتری لئی اک ہی الیکشن کروان اُتے آمادہ ہون ایہ ویلے دی لوڑ وی اے، موجودہ حالات دا ایمرجنسی نہ ایمرجنسی پلس تے نہ ہی مارشل لا علاج اے، پی ڈی ایم دااج اجلاس اوہناں دی صلاحیت دا امتحان اے ۔ امیر جماعت اسلامی سراج الحق نے ہور آکھیا اے کہ سیاسی جماعتاں نوں الیکشن لئی راضی کرنا وزیر اعظم دی ذمہ داری اے، کجھ سیاستدان اج وی مارشل لا ویکھنا چاہندے نیں جیہڑے مارشل لا وچ جمہوریت تے جمہوریت وچ مارشل لا دے حامی ہُندے نیں۔سراج الحق نے آکھیا اے کہ ملک وچ مارشل لا ہوئے یا برائے نام جمہوریت ہو ئے سیاسی لیڈراں نوں کوئی نقصان نہیں ہُندا، اک دن الیکشن دے حوالے نال سیاسی جماعتاں اک پیج اُتے نہ آون تے فیر جنرل الیکشن نہیں ہون گے صرف بلدیاتی الیکشن ہون گے۔