عدالت مذاکرات کرن اُتے مجبور نہیں کر سکدی:چیف جسٹس

اسلام آباد(پنجابی میڈیاگروپ)ملک دیاں ساریاں اسمبلیاں دے الیکشن اک نال کران دے معاملے اُتے چیف جسٹس عمر عطا بندیال نے ریمارکس دیندیاں ہویاں آکھیا اے کہ حکومت مذاکرات وچ سنجیدہ اے تے خود قدم چُکدی، مذاکرات کرن اُتے عدالت مجبور نہیں کر سکدی۔چیف جسٹس عمر عطا بندیال دی سربراہی وچ جسٹس اعجاز الااحسن ، جسٹس منیب اختر اُتے مشتمل سپریم کورٹ دے3 رکنی بنچ نے ملک بھر وچ اک دن الیکشن کران دی درخواست اُتے سماعت کیتی۔ سماعت دے شروع اُتے اٹارنی جنرل منصور اعوان روسٹرم اُتے آگئے تے عدالت نال مخاطب ہُندیاں ہویاں آکھیا کہ19اپریل نوں حکومت تے اپوزیشن وچ پہلا رابطہ ہویا، 26 اپریل نوں ملاقات اُتے اتفاق ہویا سی، 25 اپریل نوں ایاز صادق تے خواجہ سعد رفیق دی اسد قیصر نال ملاقات ہوئی۔اٹارنی جنرل دا کہناسی کہ اسد قیصر نے دسیا کہ اوہ مذاکرات لئی با اختیار نہیں ، پچھلے دناں حکومتی اتحاد دیاں ملاقاتاں ہوئیاں، 2 جماعتاں نوں مذاکرات اُتے اعتراض سی لیکن رستہ کَڈیا گیا، چیئرمین سینیٹ نے ایوان بالا وچ حکومت تے اپوزیشن نوں خطوط لکھے نیں، اوہناں نے حکومت تے اپوزیشن توں4 نام منگے نیں۔چیف جسٹس نے استفسارکیتا کہ اسد قیصر دے بعد کیہ کوشش کیتی گئی کہ کیہڑا مذاکرات لئی بااختیار اے؟جواب وچ اٹارنی جنرل نے آکھیا کہ منگل نوں میڈیا نال معلوم ہویا کہ شاہ محمود قریشی مذاکرات لئی با اختیار نیں۔چیف جسٹس نے استفسار کیتا کہ چیئرمین سینیٹ نال کس حیثیت نال رابطہ کیتا گیا؟اٹارنی جنرل نے جواب دتا کہ سینیٹ وفاق دی علامت اے ایس لئی چیئرمین سینیٹ نوںآکھیا گیا۔چیف جسٹس نے ریمارکس دتے کہ پچھلے دناں19اپریل نوں چیمبر وچ تہاڈے نال ملاقات ہوئی، ساڈے اک ساتھی دی عدم دستیابی پاروں4 وجے سماعت نہیں ہوئی سی، فاروق ایچ نائیک نے آکھیا سی چیئرمین سینیٹ سہولت کاری کرن گے، چیئرمین سینیٹ نہ حکومت دے نمائندے نیں نہ اپوزیشن دے۔دوران سماعت چیف جسٹس نے اپنے ریمارکس وچ ہور آکھیا کہ حکومت مذاکرات وچ سنجیدہ اے تے خود قدم چُکدی، مذاکرات کرن اُتے عدالت مجبور نہیں کر سکدی، عدالت صرف آئین اُتے عمل چاہندی اے تاکہ تنازع دا حل نکلے، عدالت نوں کوئی وضاحت نہیں چاہیدی، صرف حل دسن، چیئرمین سینٹ اجلاس بلان گے ایس وچ وی ویلا لگے گا۔ایس دوران پیپلزپارٹی ولوں وکیل فاروق ایچ نائیک نے آکھیا کہ ساریاں حکومتی اتحادی جماعتاں پی ٹی آئی نال مذاکرات اُتے آمادہ نیں، سینیٹ واحد ادارہ اے جیتھے ساریاں جماعتاں دی نمائندگی موجود اے، چیئرمین سینیٹ کردار صرف سہولت فراہم کرنا اے، مذاکرات سیاسی جماعتاں تے کمیٹاں نے ہی کرنے نیں، سیاسی ایشو اے ایس لئی سیاسی قائدین نوں ہی مسئلہ حل کرن دتا جائے، سیاست دا مستقبل سیاستداناں نوں ہی طے کرن دتا جائے۔ایس دوران شاہ محمود قریشی روسٹرم اُتے آگئے تے عدالت نال مخاطب ہُندیاں ہویاں آکھیا کہ حکومت دے اصراراُتے عدالت نے سیاسی اتفاق رائے لئی موقع دتا سی،ساریاں جماعتاں دی سیاسی قیادت عدالت وچ پیش ہوئی سی، پی ڈی ایم وچ اج وی مذاکرات پر اتفاق رائے نہیں ہے، عدالتی حکم کو پی ٹی آئی نے سنجیدگی سے لیا، سپریم کورٹ کا 14 مئی کا فیصلہ حتمی ہے، عدالت نے قومی مفاد وچ سیاسی جماعتاں نوں موقع فراہم کیتا ۔ وائس چیئرمین پی ٹی آئی نے ہورآکھیا کہ تحریک انصاف دے نال کوئی رابطہ نہیں کیتا گیا، پی ٹی آئی نے مینوں، فواد چودھری تے علی ظفر نوں مذاکرات لئی نامزد کیتا سی، اسد قیصر نے حکومت نوں میرے نال رابطہ کرن دا آکھیا، اج تک میرے نال کسی نے رابطہ نہیں کیتا، چیئرمین سینیٹ نے پچھلے دناں فون اُتے آکھیا وزیراعظم دے اصرار اُتے رابطہ کر رہیا ہاں،چیئرمین سینیٹ نے آکھیا کہ سپریم کورٹ وچ جیہڑیاں تجویزاں دتیاں سن اوہ کیتھے نیں، سینیٹ کمیٹی صرف تاخیری حربہ اے۔ اوہناں نے آکھیا کہ قومی اسمبلی دا اجلاس بلا کے رولز دی خلاف ورزی کیتی گئی، دھرنے دے دوران آکھیا سی پارلیمان میرا سیاسی کعبہ اے، زیر سماعت معاملے نوں پارلیمان وچ زیر بحث نہیں لیایا جا سکدا، پارلیمان وچ دھمکی آمیز لہجے تے زبان سن کے شرمندگی ہوئی، پارلیمان وچ آکھیا گیا کہ توہین پارلیمنٹ ہوئی اے، حکومت سنجیدہ اے تے اجے ہی مذاکرات لئی تیار ہاں۔چیف جسٹس نے ریمارکس دتے کہ ایہ سیاسی گلاں نیں، اسیں کیس بارے وچ گل کر رہے ہاں، تُسی کہہ رہے او کہ سنجیدگی دے نال رابطہ نہیں کیتا گیا؟شاہ محمود قریشی نے آکھیا کہ پی ٹی آئی گل بات لئی سنجیدہ اے،اسیں اج ہی بیٹھن نوں تیار ہاں، حکومت نے آئین تے عدالتی فیصلے دی خلاف ورزی دا فیصلہ کر رکھیا اے ۔ایس موقع اُتے فاروق ایچ نائیک نے آکھیا کہ آئین تے پارلیمنٹ نوں کون نیچا وکھا رہیا اے، ایس اُتے نہیں جانا چاہندا، چیئرمین سینیٹ نوں نام دیون کل ہی بیٹھن نوں تیار ہاں، مولانا فضل الرحمن نوںسینیٹ نے مذاکرات اُتے آمادہ کیتا۔چیف جسٹس نے ریمارکس دتے کہ مذاکرات دے معاملے وچ صبر و تحمل نال کم لینا ہوئے گا، عدالت دا کوئی حکم نہیں صرف تجویز اے، قومی مفاد تے آئین دی حفاظت لئی اتفاق نہ ہویا تے جِداں آکھو اوہداں ہی چلے گا۔