وزیراعظم نے قومی اسمبلی توں اعتماد دا ووٹ لے لئیا

اسلام آباد(پنجابی میڈیاگروپ)وزیر اعظم شہباز شریف قومی اسمبلی توں اعتماد دا ووٹ لے لئیا۔وزیر اعظم نوں اعتماد دا ووٹ لین لئی قرارداد بلاول بھٹو زرداری نے پیش کیتی، جس دے متن وچ آکھیا گیا کہ ایوان وزیر اعظم اُتے اعتماد رَکھدا اے، قومی اسمبلی وچ موجود 180 ارکاناں نے وزیر اعظم اُتے اعتماد کیتا۔سپیکر قومی اسمبلی نے قرارداد دی کامیابی دا اعلان کردیاں ہویاں آکھیا کہ قرارداد دے حق وچ 180 ارکان نے ووٹ دتا، مفتی عبدالشکور مرحوم ہُندے تے تعداد 181 ہُندی، جنہاں نے اعتماد دا ووٹ دتا سب دے نام قومی اسمبلی دی ویب سائٹ اُتے پادتے جان۔اعتماد دے ووٹ دی قرارداد منظور ہون دے بعد وزیر اعظم شہباز شریف نے اتحادیاںکول جا کے فردا فردا شکریہ ادا کیتا، اوہناں نے آکھیا کہ اللہ تعالی دا لکھ لکھ شکر ادا کردا ہاں، اک وار فیر معزز ایوان نے بلاول دی قرارداد اُتے مینوں180 ووٹ دتے، دل دیاں گہرائیاں نال سب دا شکریہ ادا کردا ہاں ۔ وزیر اعظم نے قومی اسمبلی نال اظہار کردیاں ہویاں آکھیا کہ آصف زرداری، بلاول بھٹو، مولانا فضل الرحمان، خالد مقبول صدیقی، اختر مینگل، خالد مگسی دا شکر گزار ہاں ،ایوان نے میرے اُتے اک وار فیر اعتماد دا اظہار کیتا سب دا مان رکھاں گا، تہانوں اعتماد نوںکَدی ٹھیس نہیں پہنچاواں گا ۔ ایس توں پہلاں وزیراعظم شہباز شریف نے اتحادی جماعتاں دے ظہرانے وچ مشاورت کیتی تے اتحادیاں نے اعتماد دا ووٹ لین دا مشورہ دیندیاں ہویاں آکھیا کہ ساہنوںتہاڈے اُتے پورا اعتماد اے،جس دے بعد وزیر اعظم نے اعتماد دا ووٹ اج لین دا فیصلہ کیتا۔