عدالت گھر گھلے گی تے میں تیار ہاں: وزیر اعظم

اسلام آباد(پنجابی میڈیاگروپ)وزیر اعظم شہباز شریف نے آکھیا اے کہ اسیں سپریم کورٹ دے 3 رکنی بینچ دے فیصلے نوں نہیں من دے، 4،3 دے فیصلے نوں مَن دے ہاں، اگر اوہ مینوں گھر گھلدے نیںتے ہزاروار جان نوں تیار ہاں لیکن ایوان دا مان نہیں توڑاں گا۔قومی اسمبلی توں اعتماددا ووٹ لین دے بعد گل بات کردیاں ہویاں وزیر اعظم شہباز شریف نے آکھیا کہ ملک شدید مشکلاں دا شکار اے،2018وچ پاکستان دی معیشت تیزی نال ترقی کر رہی سی، اوس دے بعد جھرلو زدہ الیکشن ہوئے، جنوبی پنجاب دے بعض لوکاں نوں ٹکٹاں چھڈن اُتے مجبورکیتا گیا، اوہناں لوکاں نوں پٹکا پہنایا گئیا تے کس طرح آر ٹی ایس بند کرایا گیا ۔ وزیر اعظم نے آکھیا کہ ایہ تریخ دا پہلا الیکشن سی دیہاتاں توں پہلاں تے شہراں دے نتائج التوا دا شکار ہوئے، اک شخص ثاقب نثار نے حکم دتا ووٹاں دی دوبارہ کوئی گنتی نہیں ہوئے گی، کیا کیا دھاندلی دے انتظام کیتے گئے، پچھلے وزیر اعظم نے وعدہ کیتا سی دھاندلی دی تحقیقات ہوئے گی، اج 5 ورھے لَنگ گئے، ایوان توں کہندا ہاں دھاندلی دی تحقیقات کران تاکہ مینڈیٹ چوری دا پتا چلے۔شہباز شریف نے آکھیا کہ اسیں اقتدار سنبھالیا تے سامنے چیلنج سن، جَد ساڈی آئی ایم ایف نال گل بات تیزی نال جاری سی، عمران خان نے 2 وزیر خزانہ نوںآکھیا معاہدے وچ مشکلاں پیدا کرن، ایہ اوہ سازش اے جس دا سلسلہ اجے تک جاری اے، سائفر اُتے امریکا نوں کس طرح نشانہ بنایا گیا، ساہنوں امپورٹڈ حکومت آکھیا گیا، وزارت خارجہ دی محنت نال روس توں سستا تیل چھیتی پاکستان آئے گا۔وزیر اعظم شہباز شریف نے آکھیا امپورٹڈ حکومت ہُندی تے کیا ساہنوں روس تیل دیندا ، ایہ اے بدترین سازش جیہڑی پاکستان خلاف کیتی گئی، ہُن سازش طارق رحیم ، ثاقب نثار دی گل بات وچ کھل کے سامنے آگئی اے، شیخ رشید نوں میں شیخ حرم کہندا ہاں، سابق چیف جسٹس شیخ رشید دے پولیٹیکل ایجنٹ بنے، ثاقب نثار نے دن رات ڈھائی ورھے سوموٹو لے کے قوم دا حلیہ وِگاڑ دتا۔