ادارے پہلاں نواز شریف توں معافی منگن فیر الیکشن کران:جاوید لطیف

اسلام آباد(پنجابی میڈیا گروپ)مسلم لیگ(ن) دے رہنما جاوید لطیف نے آکھیا اے کہ جنہاں اداریاں عمران خان نوں بت بنایا سی دوبارہ اپنے لیول اُتے کون لیائے گا، پہلاں نواز شریف توں معافی منگن تے کل الیکشن کرا دیون، پہلاں معافی منگنا ہوئے گی فیئر گل بات ہوئے گی۔قومی اسمبلی دے اجلاس وچ اظہار خیال کردیاں ہویاں وفاقی وزیر جاوید لطیف نے آکھیا کہ قومی اسمبلی اجلاس وچ اعتماد دا ووٹ لین اُتے خوشی لیکن 60 ورھیاں توں جیہڑی سرکس چل رہی اے، سردار اختر مینگل ایس دا تھوڑا جیہا اظہار کر رہے سن، ساڈے وڈھیاں جیہڑیاں قربانیاں دتیاں اوس دا ثمر نہیں مل سکیا، جَد تک اینہاں کرداراں نوں کٹہرے وچ نہیں لیواں گے معاملہ ٹھیک نہیں ہوئے گا۔جاوید لطیف نے آکھیا کہ جَد عمران پراجیکٹ فیل ہویا تے ادارے نے آکھیا کہ اسیں نیوٹرل ہاں، ساہنوں سن کے خوشی ہوئی لیکن ویلادسے گا کہ اوہ کِنے نیوٹرل سن، جَد میں کہندا ساں کہ سہولت کاری اج وی ہو رہی اے تے لوگ حیران ہُندے سن،2017 وچ آئین و قنون دا اطلاق کیوں نہیں ہویا، ایس ہاوس نال سارے ادارے رہنمائی لیندے نیں، ایس ہاوس دے قنون اُتے عمل نہیں ہُندا تے کیا کوئی توہین نہیں ہُندی۔