حکومت تے پی ٹی آئی وچکار مذاکرات ختم،گل بات جاری رکھن اُتے اتفاق

اسلام آباد(پنجابی میڈیاگروپ)الیکشن دے معاملے اُتے حکومت تے پی ٹی آئی دیوچکار ہون والے مذاکرات دا پہلا دور مُک گیا۔ جس وچ کوئی حتمی فیصلہ نہیں ہوسکیا لیکن دوناں مذاکراتی کمیٹیاں نے مذاکرات جاری رکھن تے کل دوبارہ بیٹھن اُتے اتفاق کیتا اے۔ پارلیمنٹ ہائوس کمیٹی روم نمبر3وچ حکومت تے پی ٹی آئی دی مذاکراتی کمیٹی دی2 گھنٹے لمبی بیٹھک ہوئی، جس وچ الیکشن بارے گل بات تے معاملات طے کرن اُتے گل بات ہوئی۔میڈیا دے مطابق عمران خان ولوں تشکیل دتی گئی پی ٹی آئی دے 3 رکنی مذاکراتی کمیٹی شاہ محمد قریشی دی سربراہی وچ حکومت نال مذاکرات لئی پارلیمنٹ ہاوس اپڑی۔ پی ٹی آئی دی کمیٹی وچ فواد چوہدری تے سینیٹر علی ظفر وی شامل سن۔حکومتی کمیٹی وچ پیپلزپارٹی دے رہنما یوسف رضا گیلانی، نوید قمر، وزیر خزانہ اسحاق ڈار، وزیر ریلوے خواجہ سعد رفیق، وزیر قنون اعظم نذیر تارڑ، لیگی رہنما ایاز صادق تے ایم کیو ایم دی رکن اسمبلی کشورہ زہرہ شامل سن۔حکومت ولوں تشکیل دتی جان والی 7رکنی کمیٹی وچ جمیعت علما اسلام دا کوئی نمائندہ رَلتی نہیں سی۔ذرائع مطابق اجلاس وچ عام الیکشن بارے مذاکرات کیتے گئے، جس وچ حکومت تے پی ٹی آئی عام الیکشن بارے اپنی اپنی تجویز رکھی۔