حکومت تے اپوزیشن مذاکرات منگل تک ملتوی

اسلام آباد(پنجابی میڈیا گروپ)حکومت تے تحریک انصاف دے وچکار مذاکرات وچ ڈیڈ لاک برقرار اے۔ذرائع مطابق حکومت الیکشن دی تریخ اُتے لچک دے جواب وچ لچک دا مطالبہ کر رہی اے۔ذرائع دا کہنا اے کہ تحریک انصاف دی کمیٹی عمران خان ولوں دتی گئی ہدایت توں پیچھے ہٹن توں گریزاں اے۔ایس حوالے نال وفاقی وزیرتے حکومتی وفد وچ شامل خواجہ سعد رفیق توں جَد صحافیاں نے پچھیا تے اوہناں دا کہنا سی نہ ڈیڈ اے نہ لاک اے۔بعد وچ حکومت تے پی ٹی آئی دے وچکار مذاکرات منگل تک ملتوی کر دتے گئے۔حکومت تے پی ٹی آئی دے وچکار مذاکرات دے دُوجے رائونڈ دے بعد میڈیا نال گل بات کردیاں ہویاں اسحاق ڈاردا کہنا سی دونوں کمیٹیاں منگل نوں11وجے دوبارہ ملن گیاں۔ اسحاق ڈار دا کہنا سی اسیں اپنی اپنی قیادت نال ملنا اے، مذاکرات وچ دوناں پاسیوں پیشرفت ہوئی اے، پی ٹی آئی تے حکومت نے اپنی اپنی تجاویز دتی اے۔اوہناں دا کہنا سی مذاکرات وچ کوئی ڈیڈ لاک نہیں اے، مذاکرات وچ دوناں پاسیوں تجویزاں اُتے گل بات کیتی گئی اے۔رہنما تحریک انصاف شاہ محمود قریشی دا میڈیا نال گل بات کردیاں ہویاں کہنا سی میری نظر وچ اج مناسب پیشرفت حاصل کیتی اے،اسیں آئین دے دائرے اندر اپنا نکتہ نظر پیش کردتااے، طے ہویا اے کہ ساڈی اگلی میٹنگ منگل نوں ہوئے گی،میں تے علی ظفر لہور جاواں گے تے عمران خان نوں پیشرفت توں آگاہ کراں گے۔شاہ محمود قریشی دا کہنا سی گرفتاریاں دا سلسلہ مذاکرات نوں تباہ کر دیوے گا،گرفتاریاں مذاکرات نوں خراب کرن دی گل اے،گرفتاریاں دا معاملہ حکومت دا اے، اگر گرفتاریاں کیتیاں جان گیاں تے فیر مذاکرات دا کوئی فائدہ نہیں۔فواد چوہدری دا کہنا سی اینہاںمذاکرات دے دوران گرفتاریاں ہو رہیاں نیں اوہ رُکنیاں چاہیدیاں نیں،حکومتی وزیر کہندے نیں کہ ایہ گرفتاریاں اوہ نہیں کر رہے، حکومتی ٹیم نال گرفتاریاں بارے آکھیا گیا،اوہناں دی گل بات نوں عمران خان سامنے رکھ رہے ہاں۔خیال رہے کہ حکومت تے پاکستان تحریک انصاف دے وفود دے وچکار اج مذاکرات دا دُوجا دور ہو رہیا اے جس وچ ملک اندر الیکشن دے حوالے نال گل بات کیتی جا رہی اے۔اج اسلام آباد وچ عدالت پیشی اُتے چیئرمین پاکستان تحریک انصاف(پی ٹی آئی)عمران خان دا کہنا سی شاہ محمود قریشی تے فواد چوہدری نوں ہدایت کیتی اے کہ اگر حکومت فوری اسمبلی توڑ کے الیکشن کرانا چاہندی اے تاں ہی گل کرن، اگر دوبارہ اوہی ستمبر اکتوبردی گل بات کردے نیں تے گل بات کرن دی کوئی لوڑ نہیں۔صحافیاں نال غیر رسمی گل بات کردیاں ہویاں عمران خان دا کہنا سی کہ 14 مئی نوں وی الیکشن نہیں ہُندے تاں آئین ٹُٹ جائے گا، اگر آئین ٹُٹ گیا تے فیر جس دا وی زور ہوئے گا اوسی دی گل بات چلے گی۔دُوجے پاسے حکومتی ذرائع دا کہنا اے کہ پاکستان تحریک انصاف(پی ٹی آئی) دے 3 مطالبات مننا مشکل اے، پی ٹی آئی دے تینوں مطالبات منن اُتے کوئی اتحادی راضی نہیں اے،پارلیمنٹ ہائوس وچ صحافی نے وزیرقنون اعظم نذیر تارڑ توں سوال کیتا کہ کیا اپوزیشن نال مذاکرات لئی حکومتی تجویز نوں حتمی شکل دے دتی گئی؟ ایس اُتے وزیرقنون دا کہنا سی کہ اجے گل بات جاری اے، حتمی شکل کِنج دتی جا سکدی اے۔ایدھر لہور ہائیکورٹ باہر میڈیا نال گل بات کردیاں ہویاں پاکستان تحریک انصاف دے صدر چوہدری پرویز الٰہی دا کہنا سی عمران خان نے شاہ محمود قریشی تے فواد چوہدری نوں ہدایت دتی اے کہ حکومت دی نیت خراب نظر آئے تے مذاکرات توں واپس آجان۔