مسئلہ کشمیر حل کیتیوں بغیر جنوبی ایشیا وچ امن ناممکن اے،وزیراعظم

رسالپور(پنجابی میڈیاگروپ)وزیراعظم شہبازشریف نے اک وار فیر واضح کیتا اے کہ مسئلہ کشمیردے حل کیتوںبغیر جنوبی ایشیا وچ امن دا قیام ناممکن اے،ساریاں ملکاں توں دوطرفہ مفادات دی بنیاداُتے مثبت تعلقات چاہندے نیں،خطے وچ امن لئی ہمسائیہ ملکاں دے نال مل کے کوشش جاری رکھاں گے ،قیام امن دی ساڈی خواہش نوں کمزوری نہ سمجھیا جائے،ایس ویلے دنیا نوں موسمیاتی تبدیلیاں سنے بوہت سارے چیلنجاں دا سامنا اے،پاکستان نوں معاشی چیلنجاںدا سامنا اے،یقین دلاندا ہاں معیشت نوں مستحکم کرن لئی ہرکوشش کیتی جائے گی تے چھیتی ملک دے معاشی حالات بہتر ہون گے،پاک فضائیہ بہترین پیشہ وارانہ صلاحیتاں پاروں دنیا بھروچ نمایاں اے، یقین اے کہ مسلح افواج ہمیشہ قوم دیاں امنگاں مطابق صلاحیتاں دامظاہرہ کردی رہے گی۔جمعہ نوں پی اے ایف اکیڈمی اصغرخان رسالپوروچ پاسنگ آئوٹ پریڈ تقریب نال بطوراُچیچے پروہنے خطاب کردیاں ہویاں اوہناں نے آکھیا کہ پاس آئوٹ ہون والے کیڈٹس تے اوہناںدے ماپیاں نوں مبارکباد پیش کردا ہاں،پاک فضائیہ دی اکیڈمی وچ اعلی معیار تے ڈسپلن ویکھ کے خوشی ہوئی اے، پاس آئوٹ ہون والے کیڈٹس مستقبل دا اثاثہ نیں، اینہاں کیڈٹس نوں کامیابی اوہناں دی مسلسل محنت تے غیرمتزلزل عزم پاروں ملی اے۔وزیر اعظم نے آکھیاکہ پاک فضائیہ نے کسی وی چیلنج وچ ملک دا نام روشن کیتا، پاک فضائیہ دنیا بھروچ بے مثال مہارت دی حامل اے۔