الیکشن لئی مسئلہ نوٹاں دا نہیں ’’ووٹاں دااے‘‘تحریک انصاف

لہور(پنجابی میڈیاگروپ)پاکستان تحریک انصاف دے رہنماواں نے آکھیا اے کہ الیکشن لئی مسئلہ نوٹاں دا نہیں ووٹاں دا اے،پاکستان وچ عوام نوں طاقت دا مرکز تسلیم کرکے الیکشن ول جانا مذاکرات دا بنیادی نکتہ اے۔پاکستان تحریک انصاف دے سیکرٹری جنرل اسد عمر نے سماجی رابطے دی ویب سائٹ ٹوئٹر اُتے’’عمران خان ساڈی ریڈ لائن‘‘دا ہیش ٹیگ استعمال کردیاں ہویاں اکھیا کہ عمران خان دا سیشن جج بارے وچ اک جملہ دے اسیں تہاڈے خلاف کاروائی کراں گے اوس اُتے پرچہ کٹ گیا،وارنٹ گرفتاری جاری ہو گئی۔ حکومتی ارکان سپریم کورٹ دے ججاں بشمول چیف جسٹس دے بدترین حملے تے دھمکیاں دے رہے نیں تے کوئی پچھن والا نہیں۔ اینہاں لاڈلیاں تے لاڈلئیاں نوں کھلی چھٹی کیوں؟اوہناں نے آکھیا کہ اک مہینے وچ500توں وَدھ تحریک انصاف دے چاہن والیاں دی گرفتاری صرف اسلام آباد وچ،اینہاں وچ بزرگ ، عورتاں،بال شامل نیں جنہاں اوہناں دا خوف ودھ ہندا گئیا اے اوہناں ہی اوہناں اُتے ظلم۔ فیر اسلام آباد ہائی کورٹ باہر توں بے گناہ شہریاں نوں گرفتار کیتا گیا۔