ساڈا واسطہ آئین شکن سرکار نال پیا اے،عمران خان

لہور(پنجابی میڈیاگروپ)چیئرمین پاکستان تحریک انصاف عمران خان نال جرمنی دے سفیر ایلفرڈ گرانس نے اُچیچی ملاقات کیتی۔زمان پارک وچ ہون والی ملاقات دوران دوناںپاسیاں دے امور، باہمی دلچسپی دے معاملات تے تحریک انصاف دے سیاسی فلسفے سنے اہم امور اُتے تفصیلی تبادلہ خیال کیتا گیا، اوس دے علاوہ پاکستان وچ انسانی حقوق دیاں خلاف ورزیاں تے حکومتی سطح اُتے دستور توں انحراف دے جمہوریت اُتے سنگین اثرات اُتے وی گل بات کیتی گئی۔ملاقات دے دوران پاکستان وچ انسانی حقوق دیاں خلاف ورزیاں دے ملک اُتے ممکنہ معاشی تے سفارتی اثرات اُتے وی گل بات ہوئی، جرمن سفیر نے انسانی حقوق دیاں خلاف ورزیاں دے ملکاں نوں دتی جان والی جی ایس پی پلس حیثیت اُتے مرتب ہون والے اثرات اُتے روشنی پائی۔ایس موقع اُتے گل کردیاں ہویاں سابق وزیر اعظم عمران خان نے آکھیا اے کہ تحریک انصاف مکمل طور اُتے آئین و قنون دی بالادستی تے جمہوریت و جمہوری اقدار دے ودھا لئی متحرک اے، بنیادی حقوق دی ضمانت تے ووٹ دی پرچی ذریعے عوامی رائے دے بل بوتے اُتے حکومت دا قیام جمہوریت دی اساس اے، قومی فیصلہ سازی وچ عوام ہی نوں طاقت دا سرچشمہ سمجھدے ہاں ۔ چیئرمین تحریک انصاف عمران خان نے آکھیا کہ ملک وچ اینج دی حکومت نال واسطہ اے جیہڑی دستور و جمہوریت نال صریح انحراف نوں اپنا حق سمجھدی اے، جمہور دی منشا دے خلاف ماورائے دستور اقداماں ذریعے عوام نوں ووٹ دے حق توں محروم کیتاجا رہیا اے، پنجاب تے کے پی وچ90دناں دی آئینی مدت لَنگ جان دے باوجود غیرقنونی نگران حکومتاں قائم نیں ۔ سابق وزیر اعظم عمران خان نے ہور آکھیا اے کہ آئین نال صریح انحراف دے نتیجے وچ اقتدار دے دوام اُتے اصرار ملک وچ سیاسی بحران نوں سنگین تے پیچیدہ بنا رہیا اے، سنگین سیاسی بحران براہ راست ملکی معیشت نوں ناقابل تصور نقصان پہنچا رہیا اے، بنیادی انسانی حقوق دی پامالی، ماورائے آئین و قنون اقدام تے آئینی آزادیاں اُتے پابندیاں نوں انداز حکمرانی بنا لئیا گیا اے۔ عمران خان نے آکھیا کہ پرامن احتجاج، قنونی انتخابی مہم تے آزادی اظہار اُتے اصرار کرن والیاں اُتے غداری تے بغاوت دے جھوٹے مقدمے درج کیتے جا رہے نیں، جمہوریت دی بقا و تسلسل لئی آئینی حدود وچ مذاکرات ذریعے بحران دے حل لئی کوشاں نیں، انسانی حقوق دی سنگین خلاف ورزیاں تے جمہوریت اُتے پیہم حملے اہل عالم دی فوری توجہ دے متقاضی نیں، عتاب دی شکار عوام، سیاسی کارکن تے آزاد صحافیاں دے حق وچ دنیا بھر اندر اٹھن والیاں آوازاںداخیر مقدم کردے ہاں۔جرمن سفیر نے گل بات کردیاں ہویاں آکھیا کہ پاکستان دی ترقی و خوشحالی تے ملک وچ جمہوریت دی بقا و تسلسل دی خواہش اے بنیادی حقوق تے جمہوری اقداردا فروغ و تحفظ سماجی نمو تے ترقی لئی اہم اے، کسی ملک وچ انسانی حقوق دی کیفیت نال حاصل جی ایس پی پلس حیثیت اُتے براہ راست اثرات مرتب ہُندے نیں، بطور شراکت دار پاکستان دی پائیدار معاشی و سماجی ترقی لئی ہر ویلے تیار نیں۔