عدلیہ آئین و قنون مطابق فیصلے کردی اے، پنچایت نہیں لاندی،خواجہ آصف

سیالکوٹ(پنجابی میڈیاگروپ)مسلم لیگ(ن) دے مرکزی رہنماتے وفاقی وزیر دفاع خواجہ آصف نے آکھیا کہ عدلیہ دا کم قنون تے آئین مطابق فیصلے کرنا اے پنچایت لانا نہیں۔میڈیا نال گل بات کردیاں ہویاں(ن) لیگی رہنما خواجہ آصف نے آکھیا کہ کیتھے لکھیا اے عدلیہ مذاکرات کروائے گی، پنچایت لانا یا مذاکرات کرنا سیاسی لوکاں دا کم اے،جَد عدلیہ دی گل آندی اے تے ایہ عوام دے اعتبار دی گل ہُندی اے۔اوہناں نے آکھیا کہ پچھلے کجھ مہینیاں دوران حالات نے کروٹ لئی اے، سابق چیف جسٹس ثاقب نثار نواز شریف دی دشمنی وچ بہت دورنکل گئے سن، ثاقب نثار نے ٹی وی اُتے تسلیم کیتا کہ ایہ میرے بیٹے دی آڈیو اے، ثاقب نثار ہی نہیں تحریک انصاف دی لیڈرشپ وی بے نقاب ہوگئی اے۔خواجہ آصف نے آکھیا کہ عمران خان نوں ہُن نویں سہولت کار ملے ہوئے نیں، عمران خان نے وزیر آباددا لانگ مارچ وی کسی دے کہن اُتے کیتا سی، اقتدار توں دوری عمران خان نوں اندروں اندروں کھائی جارہی اے،اج ملک دے سارے بحراناں دا ذمہ دار عمران خان اے۔