پلس نے جیہڑا طریقہ اپنایا اوہ قابل قبول نہیں ،شجاعت حسین

لہور(پنجابی میڈیاگروپ)پاکستان مسلم لیگ(ق) دے صدرچوہدری شجاعت حسین نے اکھیا اے کہ پلس نے جیہڑا طریقہ کاراپنایا وہ قابل قبول نہیں ، معاملے پیچھے جیہڑا وی اے حکام بالا اوس نوں کیفر کردار تک پہنچان،پاکستان بوہت پریشانیاں وچ گھریا ہویا اے،کجھ لوگ واقعات نوں غلط رنگ دے کے پاکستان وچ عجیب کیفیت پیدا کرنا چاہندے نیں، موجودہ معاشی صورتِ حال وچ ودھدیاں قیمتاں کنٹرول کرن لئی قومی سطح اُتے کمیٹی تشکیل دتی جائے۔ایہہ گلاں اوہناں نے میڈیانال گل بات کردیاں ہویاں کیتیاں۔چوہدری شجاعت حسین نے آکھیا کہ اینج دی گل بات نہیں کرنا چاہندا جس نال ملکی سطح اُتے معاملات ہورخراب ہون، پاکستان بوہت پریشانیاں وچ گھریا ہویا اے،کجھ لوگ واقعات نوں غلط رنگ دے کے پاکستان وچ عجیب کیفیت پیدا کرنا چاہندے نیں ۔ میں اوس رات پیش آن والے واقعے اُتے روشنی پاواں گا، پلس پرویز الٰہی دے گھر گئی تے اوہناں دسیا گیا کہ پرویز الٰہی چوہدری شجاعت دے گھر نیں، پلس والے پرویز الٰہی دے گھرنوں چھڈ کے میرے گھر وَل دوڑ پئی۔چوہدری شجاعت نے دسیا کہ پلس میرے دروازے اُتے پہنچی تے دونوں پُتر دروازے دے دُوجے پاسے سن،پلس والے اگے وَدھ رہے سن تے میرے دونوں پُتراں نے اوہناں نوں روکیا،پلس نے دروازہ توڑن دی کوشش کیتی،دروازے دے شیشے ٹُٹ گئے، مگر دروازہ نہ ٹُٹ سکیا۔