میرے حلقے داالیکشن سب توں وَدھ مشکل ہوئے گا،راناثناء اللہ

فیصل آباد(پنجابی میڈیاگروپ)وفاقی وزیر داخلہ وصوبائی صدر پاکستان مسلم لیگ (ن) پنجاب رانا ثنااللہ خان نے آکھیا اے کہ جنہاں لوکاں نے کلاشنکوف چلان دے سوا ساری عمر کوئی کم نہیں کیتا اوہناں عمران خان دی قیادت وچ کے پی دی حکومت نے واپس بلا کے آکھیا کہ آجائو تے ایتھے شریف شہری بن کر رہن ایہ فتنہ اک دن اک گل کردا اے تے اگلے دن کوئی ہور گل کردا اے ۔ اوہ اتواردی رات گئے اپنے حلقہ نیابت ٹھیکریوالہ فیصل آبادوچ میڈیا نال گل بات کردیاں ہویاں اکھیاکہ ساڈے اقداماں پاروں پنجاب وچ اَت گردی دے ناسوردا خاتمہ ہوچکیا اے جس دا سہرا نواز شریف دے سر اے۔ اوہناں نے آکھیا کہ اسیں اپنے دور وچ بجلی دے کئی نویں کارخانے لائے لیکن فتنہ خان نے اک وی نوا کارخانہ نہیں لایا، اسیں لمبی لوڈشیڈنگ ختم کیتی تے اگرہن کسی جگہ تھوڑی بوہت لوڈ مینجمنٹ اے تے اوس دی وجہ ایہ نہیں کہ بجلی بنان دے کارخانے نہیں بلکہ اوس دی وجہ گیس تے فرنس آئل دی کمی اے جس دا چھیتی خاتمہ کردتا جائے گا۔اوہناں نے آکیا کہ اوہ ساریاں برادریاں تے دوستاں دے شکر گزار نیں جنہاں نے اوہناں نوں منتخب کرکے عوامی خدمت دا موقع دتا۔اوہناں نے آکھیاکہ 2014 وچ عمران خان نیازی نے دھرنا دتاجس دی وجہ نال چینی صدر دا دورہ اک سال لیٹ ہویا تے ملکی ترقی متاثر ہوئی۔