عمران خان سازش کرنا بند کردیون ،مزدور دے حالات ٹھیک ہوجان گے:مریم نواز

لہور(پنجابی میڈیا گروپ)مسلم لیگ ن دی چیف آرگنائزر مریم نواز داکہنا اے کہ عمران خان سازش کرنا بند کردیون ،مزدور دے حالات ٹھیک ہوجان گے۔لہور وچ مزدوراں دے عالمی دن دے موقع اُتے کنونشن نال خطاب کردیاں ہویاں مریم نواز دا کہنا سی کہ پتہ نہیں سی مسلم لیگ ن دا لیبر ونگ اینہاں متحرک اے ، ویکھ کے خوشی ہوئی، ساڈے محنت کش ملک دی ریڑھ دی ہڈی نیں، وزیراعظم توں درخواست کراں گی کہ مزدور دی گھٹ توں گھٹ تنخواہ 40ہزار ماہانہ ہونی چاہیدی ۔اوہناں نے آکھیا کہ مشکل تے سخت معاشی حالات دے باوجود وزیراعظم نے ماہانہ تنخواہ 35ہزار روپے کیتی، 2017 وچ روٹی 2روپے دی سی تے مزدور دے بال پیٹ بھر کے روٹی کھاندے سن،اج سب توں وَدھ ترقی وچ ہتھ مزدوردا اے تے اوہناں نوں روٹی نہیں مل رہی۔مریم نوازنے آکھیا کہ ایس ملک دی ترقی وچ اک شخص حائل اے اوس دا نام عمران خان اے، اوہ وی ویلا سی جَد ڈالر 100روپے دا سی،2013توں2017تک آٹے دی قیمت35روپے توںوَدھن نہیں دتی ، نوازشریف اک ہی گل کردے سن ایس ملک دا مزدور پیٹ بھر کے کھانا کھائے ۔اوہناں نے سابق وزیراعظم اُتے تنقید کردیاں ہویاں آکھیا کہ 2روپے دی روٹی اج 25روپے دی اے ، کس نوں الزام دینا اے؟ صرف عمران خان ذمہ دار نہیں بلکہ پورا ٹولہ اے، ملک پیچھے کیوں جارہیا اے اج مینوں گل بات کرنی پئے گی، ایس گینگ دا سربراہ عمران خان اے، پاکستان دا کرپٹ ترین شخص ایس گینگ وچ شامل اے۔مریم نواز دا ہور کہنا سی کہ نوازشریف نا کھاندا اے نا کھان دیندا اے، ایہ کھاندے وی نیں تے کھان وی دیندے نیں، عمران خان دی سازش نوں سمجھن دی لوڑ اے، سینئر ترین ججاں ناانصافی دے خلاف آواز چُکی ، ایس سازش نوں سمجھن دی لوڑ اے، پرویز الٰہی اسمبلی توڑنا نہیں چاہندے سن، اصل سازش دا بھانڈا خود ایس فتنہ خان نے پھوڑا۔اوہناں نے آکھیا کہ شکر اے عمران خان دی حکومت ختم ہوئی، لانگ مارچ نکام ہویا، جیل بھرو تحریک نکام ہوئی، عمران خان دا اسمبلیاں توڑن دا فیصلہ نکام ہویا، نوازشریف اُتے جھوٹے الزام لائے گئے۔