مزدوراں نوں معاشی ترقی وچ حصہ دار بنانا بنیادی چیلنج اے:وزیراعظم

اسلام آباد( پنجابی میڈیاگروپ)وزیراعظم شہباز شریف نے آکھیا اے کہ مہنگائی پاروں محنت کش طبقہ معاشی طور اُتے شدید دبا دا شکار اے،مزدوراں نوں معاشی ترقی وچ حصہ دار بنانا بنیادی چیلنج اے۔سماجی رابطے دی ویب سائٹ ٹوئٹر اُتے اپنے ٹوئٹ وچ شہباز شریف دا کہنا سی کہ اج جدکہ اسیں محنت کشاں دے عالمی دن اُتے اوہناں نوں خراج تحسین پیش کر رہے نیں،حقیقت ایہ اے کہ عالمی منڈیاں وچ اتار چڑھان محنت کش طبقے دی معاشی مشکلاں وچ شدید ودھا کیتا اے،اجناس دی قیمتاں وچ ودھا پاروں اوہ معاشی طور اُتے شدید دبا وچ نیں۔شہباز شریف نے آکھیا کہ ترقی دی اوہ عمارت جیہڑی محنت دی بنیاد اُتے کھڑی اے اگر اوس دی تعمیر کرن والیاں نوں ترقی دے ثمرات توں محروم رکھیا گیا تے ایہ عمارت ٹٹ پھٹ دا شکار ہو جائے گی۔وزیراعظم دا ہور کہنا سی کہ مزدوراں دے حقوق نوں پورا کرنا تے اوہناں نوں معاشی ترقی وچ حصہ دار بنانا میرے خیال وچ عالمی معیشت لئی اک بنیادی چیلنج اے۔