آئین توڑیا گیا تے حقیقی آزادی دی جنگ لئی باہر نکلاں گے،عمران خان

لہور(پنجابی میڈیاگروپ)پاکستان تحریک انصاف دے چیئرمین عمران خان نے آکھیا اے کہ اگر سپریم کورٹ داحکم نہ منیا تے آئین توڑیا گیا تے چوراں تے اوہناں دے ہینڈلراں نوں خبردار کر رہا ہاں ملک وچ حقیقی آزادی دی جنگ لئی باہر نکلاں گے،اج منگل ہون والے مذاکرات وچ اک گل آکھاں گے اگر14مئی توں پہلاں باقی اسمبلیاں تحلیل کردے نیں تے اسیںاکٹھے الیکشن لئی تیار ہاں ، بصورت دیگر اسیں سپریم کورٹ توں پنجاب تے کے پی دے الیکشن دا تقاضہ کراں گے ،اگلے ہفتے دودھ دادودھ تے پانی دا پانی ہو جائے گا ۔ ایہہ گلاں اوہناں نے یوم مئی تے آئین و قنون دی حکمرانی لئی لبرٹی توں ناصر باغ تک کَڈی گئی ریلی دے رَلتیاں نال خطاب کردیاں ہویاں کیتیاں۔ریلی وچ تحریک انصاف دے رہنماواں تے کارکناں دی وڈی تعداد نے رَلت کیتی جیہڑے سارے رَستے اپنی قیادت دے حق وچ نعرے لاندے رہے ۔ عمران خان نے رَلتیاں نال خطاب کردیاں ہویاںآکھیا کہ میں سب توں پہلاں تحریک انصاف دے کارکناں تے لہوردے لوکاں نوں مبارکباد دیندا ہاں جنہاںنے یوم مئی اُتے اینہی شاندار ریلی کَڈی اے۔ اوہناں نے آکھا کہ مسلط ٹولہ الیکشن توں نٹھ رہیا اے ، ایہ الیکشن تَد کرانا چاہندے نیں جَد ایہ سمجھن گے ایہ جت سَکدے نیں، جَد عمران خان رَستے توں ہٹ جائے ، مینوں کسی نہ کسی طرح جیل وچ پادیون یا قتل کرن،ایہ چاہندے نیں عمران خان نوں رستے توں ہٹائو تے تحریک انصاف نوں کمزور کرو ، اوہناں نے پرویزالٰہی دے گھر وچ ڈاکوواں ونگوں حملہ کیتا ، میرے گھر اُتے حملہ کیتا ۔ایہ الیکشن ایس لئی نہیں کرا رہے ایہ تحریک انصاف نوں کمزور کرنا چاہندے نیں ایہ مینوں رستے توں ہٹانا چاہندے نیں ۔ اسیں اج پیغام پہنچا رہے نیں ایہ غورنال سُن لین ، سپریم کورٹ نے واضح طو راُتے آکھیا اے کہ پنجاب دا الیکشن 14 مئی نوں ہوئے گا، ساہنوں سپریم کورٹ نے آکھیا اے کہ اینہاں نال مذاکرات کرو اگر ایہ اکٹھے الیکشن لئی متفق ہو جاندے نیں صرف ایسی وجہ نال پنجاب دا الیکشن نہیں ہوئے گا، اج منگل والے دن اسیں مذاکرات وچ اک گل کہنی اے کہ اگر 14مئی توں پہلاں تُسی باقی اسمبلیاں تحلیل کردے او تے اسیں اکٹھے الیکشن لئی تیار ہاں اگر ایہ بہانے مار رہے نیں کہ بجٹ دے بعد الیکشن ہوئے گا ، ایہ سمجھدے نیں کہ اسیں اوہناں دے منصوبے وچ آ جاواں گے تے انتظار کراں گے کہ ستمبر وچ الیکشن ہون گے تے ایہ کسی غلط فہمی وچ نہ رہن ۔ اگر ایہ 14مئی توں پہلاں اسمبلیاں تحلیل نہیں کردے تے اسیں سپریم کورٹ نوں آکھاں گے پنجاب تے کے پی دا الیکشن کرائے ،ا یہ آئین کہندا اے تے ایہ ساڈا آئینی حق اے۔