سپریم کورٹ کوشش کر رہی اے حکومت مدت پوری نہ کرے،خواجہ آصف

اسلام آباد(پنجابی میڈیا گروپ) وفاقی وزیر دفاع خواجہ آصف نے آکھیا اے کہ ملکی سسٹم وچ عوامی نمائندیاں دے مینڈیٹ دا کوئی نعم البدل نہیں، سپریم کورٹ کوشش کررہی اے کہ حکومت مدت پوری نہ کرے۔قومی اسمبلی دے اجلاس وچ نکتہ اعتراض اُتے اظہار خیال کردیاں ہویاں خواجہ آصف نے آکھیا کہ عوامی نمائندے کروڑاں ووٹ لے کے پارلیمنٹ پہنچے نیں، ملکی سسٹم وچ عوامی نمائندیاں دے مینڈیٹ دا کوئی نعم البدل نہیں، پارلیمنٹ دے مینڈیٹ اُتے سوالیہ نشان اٹھدے رہے نیں، 75 ورھیاں توں عوامی نمائندے عوام دے کول جا کے اپنے عہد دی تجدید کردے نیں، کسی ادارے نے عوام دی اتنی خدمت نہیں کیتی جتنی عوامی نمائندیاں نے کیتی اے۔اوہناں نے آکھیا کہ عوامی ووٹاں نال منتخب ہون والے دی کوئی چیز پوشیدہ نہیں ہُندی، ایوان دی کارروائی ٹی وی اُتے وکھائی جاندی اے مگر عدالتی کارروائی نشر نہیں کیتی جاندی، ساہنوں سپریم کورٹ دا احترام اے، سپریم کورٹ نوں پارلیمنٹ دی کارروائی اُتے کمنٹس دینے نیں دے دیوں مگر اسپیکر قومی اسمبلی وی سپریم کورٹ توں عدالتی کارروائی دا ریکارڈ منگیاںکرن ۔ خواجہ آصف نے آکھیا کہ پنچایت لانا، مذاکرات کرانا سپریم کورٹ دا کم نہیں اے، ساہنوں متحد ہو کے ہر صورت پارلیمنٹ دا دفاع کرنا ہوئے گا ، پی ٹی آئی نوں2018 وچ سہولت کار ملے ہُن فیر مل گئے نیں، پارلیمنٹ نوں سہولت کاری سامنے دیوار بننا ہوئے گا۔ وزیر دفاع نے آکھیا کہ وزیراعظم دیاں گردناں لین دا رواج ختم ہونا چاہیدا، ساہنوں اپنے وزیراعظم دا تحفظ کرنا ہوئے گا، وزیراعظم کسی وی جماعت دا ہوئے گا تحفظ کرنا ہوئے گا،اسیں سب نوں باہمی تفریق بھُل کے پارلیمنٹ دی عزت و وقار تے سربلندی لئی لڑنا چاہیدا تے کسی وی وزیراعظم دی قربانی نوں روکنا چاہیدا۔خواجہ آصف نے آکھیا کہ ماضی وچ وزیر اعظم نوں گھراں نوں گھلیا گیا، نوازشریف نوں تاحیات نااہل کیتا گیا، ہُن ساہنوں ججاں دی تریخ دا حساب دتا جائے۔ اوہناں نے مطالبہ کیتا کہ اسمبلی وچ اسپیشل کمیٹی بنائی جائے جییہڑی عدالت تے ججاں دے حوالے نال معاملات نوں ویکھے تے چھان بین کرے۔وزیردفاع دا کہنا سی کہ چارٹر آف ڈیموکریسی دے بعد حکومتاں نے مدتاں پوریاں کیتیاں، سپریم کورٹ کوشش کر رہی اے حکومت مدت پوری نہ کرے، آئین تے پارلیمنٹ سب توں مقدم نیں تے ایس توںوَدھ کوئی ہور چیز اہم نہیں، عوامی نمائندے ہر 5ورھے بعد عوام نوں حساب دیندے نیں تے مسلسل رابطیاں وچ رہندے نیں۔اوہناں نے آکھیا کہ شاہراہ دستور اُتے اعلی عدلیہ دے ججاں لئی روٹ لگدے نیں مگر وزیراں تک لئی روٹ نہیں لگدے، ایسی عدلیہ نے جنرل مشرف نوں آئین وچ ترمیم دی اجازت دتی، ماضی وچ اک شخص نے ذاتی ہوس لئی آئین توڑیا، ہُن اگر جنگ لڑنی تے فیر کھل کے جنگ ہوئے گی تے پارلیمنٹ نوں اپنا دفاع کرنا ہوئیگا تے75 ورھیاں بعد ہُن خموش بیٹھے گی نہ اپنے وزیراعظم دی قربانی دیوے گی۔وزیر دفاع نے ہورآکھیا کہ قاضی فائز عیسی دے نال زیادتی کیتی جارہی اے، تُسی خود عدلیہ دی عزت نہیں کیتی تے کوئی ہور کِنج کرے گا، کَدی کوئی دھمکی دتی جاندی اے کَدی کوئی دھمکی دتی جاندیاے، اوہناں دی خواہش اے کہ ایہ پارلیمان وی مدت پوری نہ کرے۔خواجہ آصف دا کہنا سی کہ ان(سپریم کورٹ)نوں وی دسیا جانا چاہیدا کہ اوہناں دی کیہ اوقات اے، پاکستان بنن توں لیہ کے 1947اج جنہے ججاں تے آمراں نے جو کجھ آئین نال کیتا اے اوس داریکارڈ منگیا جائے، جیہڑے مر گئے یا زندہ نیں اوہناں دا کردار قوم سامنے لیایا جائے، سپریم کورٹ توں وی ججاں دے اختلافی نوٹ تے بینچ توں وَکھ ہون دا ریکارڈ منگیا جائے۔