نوجواناں نوں پاکستان دے خلاف کرن دی مہم چلائی جا رہی اے:مریم نواز

لہور( پنجابی میڈیاگروپ)مسلم لیگ (ن) دی نائب صدر مریم نواز دی صدارت وچ یوتھ تے خواتین ونگز دی ممبر سازی مہم دا جائزہ اجلاس ہویا۔اجلاس وچ پنجاب بھر توں یوتھ تے خواتین ونگز دی جاری ممبر سازی مہم دا جائزہ لئیا گیا، اوس دے علاوہ کیو آر کوڈ ذریعے نوجواناں تے عورتاں دی پارٹی وچ شمولیت دے عمل دی پیش رفت اُتے وی سوچ وچار کیتا گیا ۔ مریم نواز نے نوجواناں تے عورتاں دی پارٹی وچ شمولیت دے عمل اُتے اطمینان دا اظہار کیتا تے رجسٹریشن وچ بھرپور رَلت کرن اُتے عورتاں تے نوجواناں دا شکریہ ادا کیتا۔ایس موقع اُتے گل بات کردیاں ہویاں مریم نواز نے آکھیا اے کہ نوجوان تے خواتین معاشرے وچ سب توں وَدھ آبادی رکھن والے طبقات نیں، اوہناں دی سیاسی عمل وچ شمولیت بڑی تبدیلی لیا سکدی اے، نوجوان تے عورتاں آبادی نوں اپنے بہتر مستقبل لئی درست سیاسی فیصلے کرنے ہون گے۔مریم نواز شریف نے ہور آکھیا اے کہ نوجواناں نوں فیصلہ سازی وچ شامل کرن دا مقصد اوہناں دے مستقبل نوں محفوظ بنانا اے، نوجواناں نوں پاکستان توں مایوس کرن دی منظم سازش نکام بناواں گے، نوجوان مستقبل دی قیادت نیں اوہناں نوں قوم دا معمارتے بااختیار بناواں گے۔