لہور ہائی کورٹ نے چودھری پرویز الٰہی نوں گرفتار کرن توں روک دتا

لہور(پنجابی میڈیاگروپ)لہور ہائی کورٹ نے سابق وزیر اعلی پنجاب چودھری پرویز الٰہی نوں اج رات 12 وجے تک کسی وی مقدمے وچ گرفتار کرن توں روک دتا ۔ لہور ہائی کورٹ وچ چودھری پرویز الٰہی ولوں ممکنہ گرفتاری روکن لئی درخواست دی سماعت ہوئی، جسٹس صفدر سلیم شاہد نے اپنے چیمبر وچ کیس دی سماعت کیتی، عدالت نے پلس تے اینٹی کرپشن توں 7 دناں وچ کیساں دی تفصیل منگ لئی۔عدالت وچ پیشی دے بعد میڈیا نال گل کردیاں ہویاں تحریک انصاف دے مرکزی صدر چودھری پرویز الٰہی نے آکھیا اے کہ اج ساہنوں عدالت نے ریلیف دتا اے، افسوس گھر دے اندروں آکے وار کیتا گیا اے، اللہ پچھے گا، پنجاب دی نگران حکومت ختم ہو چکی اے۔سابق وزیر اعلی پنجاب نے آکھیا اے کہ میرے خلاف کارروائی وچ شہبازشریف وی شامل اے،اوہناں دے حکم اُتے سارا کجھ ہو رہیا اے، الیکشن ہر صورت ہون گے تے تحریک انصاف کلین سویپ کرے گی، الیکشن وچ شریفاں دا جو حشر ہوئے گا سب ویکھن گے۔