میرے خلاف وی منشیات دا جھوٹا مقدمہ بنایا گیا،رانا ثنااللہ

مکوآنہ (پنجابی میڈیا گروپ)وفاقی وزیر داخلہ وصوبائی صدر پاکستان مسلم لیگ (ن) پنجاب رانا ثنااللہ خان نے آکھیا اے کہ جَد وی ملک وچ بحران آیا قوم دے اعتماد نال نواز شریف نے ملک نوںبحراناں توں کَڈیاجدکہ عمران خان پاروں سیاست وچ نفرت ودھی تے اوئے توئے دے کلچر نوں فروغ ملیا جس نال کسی دی وی عزت محفوظ نہیں رہی لہٰذا ایسی فطرت والا شخص قوم نوں کنج اگے لے کے چل سکدا اے۔حلقہ این اے 106 دے علاقہ جھپال73 ج ب وچ میڈی نال گل بات کردیاں ہویاں اوہناں نے آکھیا کہ عمران خان دی کل تے اج دی بات نہیں ملدی تے اوس دے قول و فعل وچ بری طرح تضاد اے، ایہ قدم قدم اُتے دھمکیاں دے کے اقتدار وچ آن لئی ہتھ پیر ماررہیا اے،25 مئی نوں وی اوس نے ڈرایا دھمکایا کہ میں ایہ کردیاں گااوہ کردیاں گا لیکن ہویا کجھ وی نہیں،اوس دی جیل بھرو تحریک دا ڈرامہ وی بری طرح فلاپ ہویا۔اوہناں نے آکھیا کہ ملک وچ ایس ویلے جیہڑے حالات نیں اوس وچ کوئی شک نہیں کہ 5 ورھیاں توں مہنگائی عروج اُتے اے لیکن ایہ ویکھن کہ ایہ سلسلہ کَدوں شروع ہویا،2013 وچ ات گردی عروج اُتے سی مگر تُسی میاں نواز شریف اُتے اعتماد کیتا،فتنہ خان نے 126 دن دھرنا دتا تے اوس نے پوری کوشش کیتی کہ ملک وچ سیاسی عدم استحکام ہوئے،ایس آدمی دا کردار ویکھ لین۔