حکومت دی سوچ کل والی ہی رہی تے ہور مذاکرات بے معنی نیں،شاہ محمودقریشی

اسلام آباد(پنجابی میڈیا گروپ)پاکستان تحریک انصاف دے وائس چیئرمین شاہ محمود قریشی نے آکھیا اے کہ پہلاں ہی آکھیا سی مذاکرات نوں تاخیری حربے دے طوراُتے استعمال نہ کیتا جائے، حکومت دی جیہڑی سوچ کل ویکھی اگر اوہی رہندی اے تے مذاکرات دی ہور نشست بے معنی وکھائی دیندی اے۔اک بیان وچ شاہ محمود قریشی نے آکھیا کہ جوکجھ کہنا سی تے جو میزاُتے رکھنا تے اوہ اسیں مذاکرات وچ رکھ دتا، حکومتی حلقیاں نے مذاکرات نوں سبوتاژ کرن لئی ہر ممکن کوشش کیتی، مذاکرات توں پہلاں خواجہ آصف، جاویدلطیف دی گل بات ویکھ لو، مولانا فضل الرحمان دا رویہ ویکھ لو، حکومتی نمائندیاں دے روئیاں تے گل بات دے باوجود اسیں کوشش کیتی۔شاہ محمود قریشی نے آکھیا کہ اک پاسے مذاکرات تے دُوجے پاسے ساڈے گھراں اُتے حملے کیتے گئے،گھراںاُتے حملیاں دے باوجود مذاکرات جاری رکھے تاکہ قوم نوںایس ہیجانی صورت حال توں کَڈیئے، مئی دے الیکشن لئی اسیں تیارہاں۔