اتحادی حکومت میڈیا دی آزادی اُتے مکمل یقین رکھدی اے،مریم اورنگزیب

اسلام آباد(پنجابی میڈیا گروپ)وفاقی وزیر اطلاعات و نشریات مریم اورنگزیب نے آکھیا اے کہ وزیراعظم شہباز شریف دی قیادت وچ اتحادی حکومت پریس دی آزادی اُتے مکمل یقین رکھدی اے۔پریس فریڈم ڈے دے موقع اُتے اپنے بیان وچ وفاقی وزیر اطلاعات مریم اورنگزیب نے آکھی کہ اج پاکستان سنے دنیا بھر وچ آزادی صحافت دا عالمی دن منایا جا رہیا اے، پاکستان داآئین آزادی صحافت تے شہریاں دی درست اطلاع تک رسائی دے حق دی ضمانت دیندا اے۔اوہناں نے آکھیا کہ اج دے دن اینہاں صحافیاں نوںخراج عقیدت پیش کرنا چاہواں گی جنہاں نے سچ دی تلاش وچ اپنیاں جاناں گنوا دتیاں، پاکستان وچ2018توں2022تک صحافت اک کٹھن دور توں لَنگی، پی ٹی آئی دے4 سالہ دور وچ اک اینج دی پراسرار سنسرشپ جاری سی جس نے صحافیاں نوں خوفزدہ کیتا۔مریم اورنگزیب نے آکھیا کہ2017 وچ ورلڈ پریس فریڈم انڈیکس وچ پاکستان139ویں نمبر اُتے سی ، پی ٹی آئی دی میڈیا دشمن پالیسیاں پاروں درجہ بندی وچ12 پوائنٹ دی ہور کمی ہوئی، وزارت عظمی دی کرسی اُتے بیٹھے شخص نوں پریس فریڈم پریڈیٹر دا شرمناک خطاب دتا گیا۔