پارلیمنٹ وچ سپریم کورٹ دی غیر اخلاقی مداخلت روکی جائے،خواجہ آصف

اسلام آباد(پنجابی میڈیا گروپ) وزیر دفاع خواجہ آصف نے آکھیا اے کہ 2آئینی ادارے آمنے سامنے آ چکے نیں، پارلیمنٹ وچ سپریم کورٹ دی غیر اخلاقی مداخلت روکی جائے۔قومی اسمبلی وچ اظہار خیال کردیاں ہویاں وزیر دفاع خواجہ محمد آصف نے آکھیا کہ عدلیہ دا بنیادی کم انصاف دی فراہمی اے، اسیں آئین دے تقدس نوں پامال نہیں ہون دیاں گے، جَد وی آئین دی خلاف ورزی ہوئی ایس اُتے عدلیہ نے مہر لائی ۔ وزیر دفاع خواجہ آصف دا کہنا سی کہ اسیں عدلیہ دے خلاف نہیں لیکن اداریاں نوں پارلیمان دے اختیار وچ مداخلت نہیں کرنی چاہیدی،2 ادارے آمنے سامنے آچکے نیں، آئین دی تشریح کرن والیاں وچ تضاد سامنے آ رہے نیں، عدلیہ نوں ساڈی تے ساہنوں عدلیہ دی حدود وچ نہیں جانا چاہیدا۔خواجہ آصف دا کہنا سی کہ عدالت وچ اج وی وڈی تعداد وچ مقدمے زیر التوا نیں،4لکھ توں وَِدھ کیسز پینڈنگ نیں ایہ ساڈی عدلیہ دا حال اے، قرارداد ذریعے پورے ہاوس دی اک کمیٹی بنائی جائے جیہڑی ایہ ویکھے کہ ماضی وچ آئین دے نال کیہ ہُندا رہیا، جسٹس منیر توں لے کے اج تک جو کجھ ہویا اوس دی تحقیقات ہونی چاہیدی اے۔خواجہ آصف نے آکھیا کہ اسیں آئین بنان والے ہاں اپنی تخلیق دی کَدی خلاف ورزی کراں گے نہ کرن دیاں گے۔